പിടികിട്ടാപ്പുള്ളി സുകുമാരക്കുറുപ്പിന്റെ കഥ പറയുന്ന സിനിമയാണ് കുറുപ്. ശ്രീനാഥ് രാജേന്ദ്രൻ സംവിധാനം ചെയ്യുന്ന സിനിമയിൽ ദുൽഖർ സൽമാൻ ആണ് കുറുപ് ആയി എത്തുന്നത്. നവംബർ 12ന് കുറുപ് തിയറ്ററുകളിൽ എത്തും. കുറുപ് തിയറ്ററിൽ എത്തുന്നതിനു മുമ്പ് സിനിമ കണ്ടിരിക്കുകയാണ് സുകുമാരക്കുറുപ്പ് കൊലപ്പെടുത്തിയ ചാക്കോയുടെ മകൻ ജിതിൻ. സിനിമ പ്രഖ്യാപിച്ചപ്പോൾ തന്നെ വിമർശനവുമായി എത്തിയ ജിതിൻ കുറുപിനെ ഗ്ലോറിഫൈ ചെയ്യുന്നതിന് നിയമനടപടി സ്വീകരിക്കാൻ ഒരുങ്ങിയിരുന്നു. അതേസമയം, കുറുപ് സിനിമ കണ്ടതായും തന്റെ അപ്പനെ കൊന്നത് കൂടാതെ കുറുപ് നിരവധി ക്രൂരകൃത്യങ്ങൾ ചെയ്തിട്ടുണ്ടെന്ന് മനസിലായതായും ജിതിൻ ചാക്കോ പറഞ്ഞു. ദ ക്യൂവിന് നൽകിയ അഭിമുഖത്തിലാണ് ജിതിൻ ഇങ്ങനെ പറഞ്ഞത്. തന്റെ അപ്പന്റെ കൊലയാളി നാളെ സമൂഹത്തിനു മുന്നിൽ ഹീറോയാകാൻ പാടില്ല എന്ന് മാത്രമായിരുന്നു. അത് സിനിമ കണ്ടപ്പോൾ തനിക്ക് മനസിലായെന്നും ജിതിൻ പറഞ്ഞു.
സിനിമയുടെ പ്രമോഷന് വേണ്ടി കുറുപിന്റെ പേര് ഹൈപ്പ് ചെയ്ത് കാണിക്കുന്നത് വിഷമമുള്ള കാര്യമായിരുന്നു. പക്ഷേ, കുറുപ് എന്ന സിനിമ ജനങ്ങളിലേക്ക് എത്തുന്നതിൽ സന്തോഷമുണ്ടെന്നും ജിതിൻ വ്യക്തമാക്കി. സിനിമ കണ്ടു കഴിഞ്ഞപ്പോൾ സിനിമയുടെ പിന്നണിയിൽ ഉള്ളവരോട് എനിക്കുള്ള ദേഷ്യമൊക്കെ മാറി. സിനിമ എന്താണ് ഉദ്ദേശിക്കുന്നതെന്ന് ആദ്യമേ മനസിലാക്കി തന്നിരുന്നെങ്കിൽ അനാവശ്യ വിവാദങ്ങൾ ഒഴിവാക്കാമായിരുന്നു. സിനിമയിൽ സുകുമാരക്കുറുപ്പ് ആരാണെന്നും അയാൾ എന്താണെന്നും വ്യക്തമാക്കി തരികയാണ് ചെയ്യുന്നത്. ഒരിക്കലും കുറുപിനെ സിനിമയിൽ ഗ്ലോറിഫൈ ചെയ്യുന്നില്ലെന്നും ജിതിൻ വ്യക്തമാക്കി. സുകുമാരക്കുറുപ്പ് എന്നയാൾ ഇൻഷുറൻസ് തുകയ്ക്ക് വേണ്ടി തന്റെ അപ്പനെ കൊലപ്പെടുത്തി എന്നാണ് തനിക്ക് ഉൾപ്പെടെയുള്ളവർക്ക് അറിയാവുന്നത്. അത് തന്നെ പത്രങ്ങളിലും മാഗസിനുകളിലും മറ്റും വായിച്ചുള്ള അറിവാണ്. അമ്മയുമായി ഇതിനെക്കുറിച്ച് സംസാരിച്ചിട്ടില്ല. എന്നാൽ, തന്റെ അപ്പനെ കൊന്നത് മാത്രമല്ല സുകുമാരക്കുറുപ്പ് ചെയ്തിട്ടുള്ളതെന്ന് സിനിമ കണ്ടപ്പോൾ മനസിലായി. സുകുമാരക്കുറുപ്പിനെ ഗ്ലോറിഫൈ ചെയ്യുന്ന നീതികേട് ചെയ്യില്ലെന്ന് സംവിധായകനും നിർമാതാക്കളും ആദ്യം മുതൽ തന്നെ പറഞ്ഞിരുന്നു. അത് ബോധ്യപ്പെടുത്താൻ സിനിമ കാണിക്കാമെന്ന് പറഞ്ഞിരുന്നു. അങ്ങനെയാണ് കുറുപ് സിനിമ കണ്ടതെന്നും ജിതിൻ പറഞ്ഞു.
ആദ്യം എഡിറ്റിങ് മുഴുവൻ പൂർത്തിയാകുന്നതിന് മുമ്പ് കഥ എന്താണെന്ന് കാണിച്ചു തന്നു. പിന്നീട് സിനിമ മുഴുവൻ പൂർത്തിയായതിനു ശേഷം എറണാകുളത്ത് പോയി കണ്ടു. താൻ മാത്രമാണ് സിനിമ കണ്ടതെന്നും അമ്മ അതെല്ലാം വീണ്ടും കാണാൻ മാനസികമായി തയ്യാറല്ലായിരുന്നു എന്നും ജിതിൻ വ്യക്തമാക്കി. സിനിമ കണ്ട് കഴിഞ്ഞപ്പോൾ ലോകം അറിയേണ്ട ഒരുപാട് കാര്യങ്ങൾ സിനിമയിൽ ഉള്ളതായി മനസിലായി. ആദ്യം സിനിമയ്ക്ക് എതിരെ കേസ് കൊടുക്കാൻ തീരുമാനിച്ചിരുന്നു. എന്നാൽ, സിനിമ കണ്ടു കഴിഞ്ഞപ്പോൾ അതിന്റെ ആവശ്യമില്ലെന്ന് വ്യക്തമായെന്നും ശരിക്കും ഇത് ജനങ്ങൾ കാണേണ്ട സിനിമയാണെന്നും ജിതിൻ പറഞ്ഞു. നവംബർ 12നാണ് കുറുപ് റിലീസിന് എത്തുന്നത്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിലാണ് ചിത്രം റിലീസ് ചെയ്യുന്നത്. ദുല്‍ഖറിന്റെ ഉടമസ്ഥതയിലുള്ള വേഫറെര്‍ ഫിലിംസും എം സ്റ്റാര്‍ എന്റര്‍ടൈന്‍മെന്റ്‌സും ചേര്‍ന്നാണ് ചിത്രം നിർമിച്ചിരിക്കുന്നത്.
