ജേക്കബിന്റെ സ്വർഗ്ഗരാജ്യം, ചാർലി, എന്ന് നിന്റെ മൊയ്‌ദീൻ തുടങ്ങിയ ചിത്രങ്ങളിലൂടെ മലയാളികൾക്ക് സിനിമാറ്റോഗ്രാഫിയുടെ പുതിയ തലങ്ങൾ കാണിച്ചു തന്ന ജോമോൻ ടി ജോൺ മലയാളത്തിലേക്ക് തിരികെയെത്തുന്നു. നിവിൻ പോളി – നയൻതാര ജോഡിയെ നായകരാക്കി ധ്യാൻ ശ്രീനിവാസൻ ഒരുക്കുന്ന ലൗ ആക്ഷൻ ഡ്രാമയിലൂടെയാണ് ജോമോൻ ടി ജോണിന്റെ തിരിച്ചു വരവ്. ജേക്കബിന്റെ സ്വർഗ്ഗരാജ്യത്തിന് പിന്നാലെ എന്നൈ നോക്കി പായും തോട്ട, ഗോൽമാൽ എഗൈൻ, സിംബ എന്നിങ്ങനെ തമിഴിലും ബോളിവുഡിലും തിരക്കേറിയ ജോമോൻ ടി ജോണിന്റെ തിരിച്ചുവരവ് മലയാളികൾക്ക് എന്തായാലും ഒരു ദൃശ്യവിരുന്ന് തന്നെയായിരിക്കും.
സാമ്പത്തിക അടിത്തറയുള്ള നാട്ടിലെ ഉയർന്ന കുടുംബാംഗമാണ് ദിനേശൻ. ഒരു വിവാഹച്ചടങ്ങിനിടയിലാണ് മലയാളവും തമിഴും ഒരുപോലെ കൈകാര്യം ചെയ്യുന്ന ശോഭയെ ദിനേശൻ കണ്ടുമുട്ടുന്നത്. ഒരു പാലക്കാടൻ ബ്രാഹ്മണക്കുട്ടിയാണ് ശോഭ. സ്വന്തമായി വരുമാനം കണ്ടെത്തുന്നവൾ. അഭിമാനികളായ രണ്ടുപേരും സ്വന്തം കാലിൽ നില്ക്കാൻ ശ്രമിക്കുന്നവരാണ്. ഇവരുടെ പ്രണയം നർമവും ആക്ഷനും കൂട്ടിയിണക്കിയാണ് ലൗ ആക്ഷൻ ഡ്രാമയിൽ അവതരിപ്പിക്കുന്നത്. ഫന്റാസ്റ്റിക്ക് ഫിലിംസ്, എം സ്റ്റാർ എന്റർടൈന്മെന്റ്സ് എന്നീ ബാനറുകളിൽ അജു വർഗീസും വിശാഖ് പി സുബ്രഹ്മണ്യം എന്നിവരാണ് ചിത്രത്തിന്റെ നിർമാണം. ശ്രീനിവാസൻ, മല്ലിക സുകുമാരൻ, അജു വർഗീസ്, ധന്യ ബാലകൃഷ്ണൻ, ജൂഡ് ആന്റണി എന്നിവർക്കൊപ്പം തമിഴിൽ നിന്നും കന്നടയിൽ നിന്നുമുള്ള അഭിനേതാക്കളും ചിത്രത്തിൽ അഭിനയിക്കുന്നുണ്ട്. ഷാൻ റഹ്മാനാണ് സംഗീതം. പ്രതീഷ് എം വർമ്മ ഛായാഗ്രഹണവും വിവേക് എഡിറ്റിംഗും നിർവഹിക്കുന്നു.
