എണ്ണം പറഞ്ഞ ത്രില്ലറുകൾ തമിഴിൽ നിന്നും തെലുങ്കിൽ നിന്നുമെല്ലാം എത്തി മലയാളത്തിൽ കൈയ്യടികൾ വാങ്ങുമ്പോൾ എന്തുകൊണ്ടാണ് ഇവിടെ ഇങ്ങനത്തെ ചിത്രങ്ങൾ പിറക്കാത്തത് എന്ന് ആലോചിച്ചവരാണ് നാമെല്ലാവരും. അതിനുള്ള ഉത്തരമാണ് ജോജു ജോർജ് നായകനായ എം പദ്മകുമാർ ചിത്രം ‘ജോസഫ്’. താരപകിട്ടല്ല തിരക്കഥയും പ്രകടനവും നല്ലൊരു സംവിധായകനുമാണ് ഒരു ചിത്രത്തിന്റെ യഥാർത്ഥ വിജയമെന്ന് വീണ്ടും തെളിയിച്ചിരിക്കുകയാണ് ജോസഫ് എന്ന ഈ ഇൻവെസ്റ്റിഗേഷൻ ത്രില്ലർ. ഒരു റിട്ടയേർഡ് പോലീസുകാരന്റെ ജീവിതത്തിലെ സംഭവവികാസങ്ങളിലൂടെ കടന്ന് പോകുന്ന ജോസഫ് എന്ന ചിത്രം പ്രേക്ഷകന് സമ്മാനിച്ചിരിക്കുന്നത് വേറിട്ടൊരു ചലച്ചിത്രാനുഭവം തന്നെയാണ്. പ്രശസ്‌ത ഓൺലൈൻ ടിക്കറ്റ് ബുക്കിംഗ് സൈറ്റായ ബുക്ക് മൈ ഷോയിൽ 87 ശതമാനമാണ് ചിത്രത്തിന്റെ റേറ്റിംഗ് ഇട്ടിരിക്കുന്നത്. ഒരു മലയാള സിനിമക്ക് ഈ അടുത്ത കാലത്ത് ലഭിക്കുന്ന ഏറ്റവും വലിയ റേറ്റിംഗ് ആണിത്. 8.9/10 ആണ് IMDB നൽകിയിരിക്കുന്ന റേറ്റിങ്ങ്. ഈ റേറ്റിങ്ങുകൾ തന്നെ തെളിയിക്കുന്നുണ്ട് ജോസഫിന്റെ മാഹാത്മ്യം.
കണ്ടു പരിചയിച്ച ജോജു ജോർജിൽ നിന്നും നായക കഥാപാത്രമായ ജോസഫിലേക്കുള്ള വിദൂര സാമ്യം പോലുമില്ലാത്ത അസാമാന്യപകർന്നാട്ടമാണ് ജോസഫ് എന്ന ചിത്രം. തമിഴ് സിനിമകളിലെ ത്രില്ലറുകൾ ആഘോഷിക്കപ്പെടുമ്പോൾ ജോസഫ് മലയാളത്തിന്റെ അഭിമാന മുഖമാണെന്ന് നിസംശയം ഒപ്പുവെയ്ക്കാം. നിൽപിലും നടപ്പിലും തീക്ഷ്ണനോട്ടത്തിലും ജോസഫ് എന്ന ഈ പോലീസുകാരൻ മനസിലേക്ക് മാർച്ചുചെയ്യും. സ്കൂട്ടറിൽ എരിയുന്ന ബീഡിയുമായി ജീവിതം സമ്മാനിച്ച വ്യർത്ഥതയുടെ, വ്യഥകളുടെ എല്ലാ ഭാവങ്ങളും പേറി ജോസഫായി നായകൻ നൽകുന്ന സ്ക്രീൻ പ്രെസൻസ് ഒന്നു വേറെ തന്നെയാണ്. ഏറെ ചിരിപ്പിച്ചിട്ടുള്ള ജോജു ജോർജ് എന്ന നടന്റെ ഇങ്ങനെ ഒരു മുഖം തിരിച്ചറിയാൻ നാം വൈകിപ്പോയോ എന്ന് മാത്രമേ സംശയം ഉള്ളൂ.
