ചെറിയ ഒരു ഇടവേളയ്ക്കു ശേഷം അനൂപ് സത്യൻ സംവിധാനം ചെയ്ത വരനെ ആവശ്യമുണ്ട് എന്ന ചിത്രത്തിലൂടെ സിനിമാരംഗത്തേക്ക് വീണ്ടും കടന്നു വന്ന താരമാണ് സുരേഷ് ഗോപി. താരത്തിന്റെ തിരിച്ചുവരവ് ഏറെ ആകാംക്ഷയോടെ കാത്തിരുന്ന പ്രേക്ഷകരുടെ മനസ്സ് നിറയ്ക്കുന്ന ചിത്രമായിരുന്നു വരനെ ആവശ്യമുണ്ട്. നിഥിൻ രഞ്ജി പണിക്കർ സംവിധാനം ചെയ്യുന്ന കാവൽ എന്ന ആക്ഷൻ ക്രൈം ത്രില്ലറാണ് സുരേഷ് ഗോപിയിൽനിന്നും ഇനി ആരാധകർ കാത്തിരിക്കുന്ന ചിത്രം. കാവലിന്റെ ചിത്രീകരണം പുരോഗമിക്കവെ ലൊക്കേഷനിൽ നിന്നൊരു ചിത്രം സുരേഷ് ഗോപി ഫെയ്സ്ബുക്കിലൂടെ പങ്കു വച്ചിരിക്കുകയാണ്.
ഒരു ആശുപത്രിയിൽ വച്ച് പോലീസുകാരനെ ചുമരോടു ചേർത്തു നിർത്തി മുട്ടുകൊണ്ടിടിക്കുന്ന മോഹൻ സുരഭി പകർത്തിയ ഒരു ചിത്രമാണ് സുരേഷ് ഗോപി പങ്കുവച്ചിരിക്കുന്നത്. ‘സത്യം തെളിയുന്നതുവരെ, കുടുംബത്തിനും, നിങ്ങൾക്കും കാവലായി ഞാനും, എനിക്ക് കാവലായി ദൈവവും ഉണ്ട്-‘എന്നതാണ് ചിത്രത്തിന്റെ അടിക്കുറിപ്പ്. മോഹൻലാലിനെ നായകനാക്കി പ്രിഥ്വിരാജ് സുകുമാരൻ സംവിധാനം ചെയ്ത ലൂസിഫർ എന്ന ചിത്രത്തിലും ഇത്തരത്തിൽ മോഹൻലാൽ പോലീസുകാരനെ ചവിട്ടുന്ന ഒരു സീൻ ഉണ്ടായിരുന്നു. ജനങ്ങൾ ഏറെ ഏറ്റെടുത്ത ഒരു സീനായിരുന്നു അത്.
