ആലീസ് ഇൻ വണ്ടർലാൻഡ് എന്ന സിനിമയിലൂടെ മലയാളത്തിലേക്ക് കടന്നുവന്ന താരമാണ് കാതൽ സന്ധ്യ. 2004 ൽ ഭരത് നായകനായ കാതൽ എന്ന ചിത്രത്തിലൂടെ തെന്നിന്ത്യൻ സിനിമാലോകത്തേക്ക് എത്തിയ താരത്തിന് ഈ സിനിമക്ക് ശേഷമാണ് കാതൽ സന്ധ്യ എന്ന പേര് വന്നത്. തമിഴകത്തെ ലിറ്റിൽ സൂപ്പർസ്റ്റാർ ചിമ്പു മുഖ്യവേഷത്തിൽ എത്തിയ വല്ലവൻ എന്ന ചിത്രത്തിൽ താൻ വഞ്ചിക്കപ്പെട്ടുവെന്ന് സന്ധ്യ മുൻപ് ഒരു അഭിമുഖത്തിൽ വെളിപ്പെടുത്തിയിരുന്നു. ഇപ്പോൾ ആ സിനിമയെ പറ്റി ഓർക്കുമ്പോൾ നിരാശ മാത്രമാണ് തനിക്കുള്ളതെന്ന് തുറന്നുപറയുകയാണ് സന്ധ്യ. ആ ചിത്രത്തിൽ സന്ധ്യയോടൊപ്പം ചിമ്പുവും നയൻതാരയും അഭിനയിച്ചിരുന്നു. ചിമ്പുവും നയൻതാരയും ഒന്നിച്ച് ഉള്ള ഒരു ഗ്ലാമർ സീൻ ഏറെ ചർച്ചാവിഷയമായിരുന്നതാണ്. തന്നോട് പറഞ്ഞ സിനിമയുടെ കഥ ഒരു സൗഹൃദത്തിന്റെത് ആയിരുന്നുവെന്നും അത് ഇപ്പോൾ വെളിപ്പെടുത്തിയാൽ ഈ ചിത്രം അല്ലല്ലോ തങ്ങൾ കണ്ടത് എന്ന് ആരാധകർ ചോദിക്കുമെന്നും സന്ധ്യ പറയുന്നു.
താരത്തിന്റെ വാക്കുകൾ:
എന്നോട് പറഞ്ഞ കഥയും പുറത്തിറങ്ങിയ സിനിമയും തമ്മിൽ ഒരുപാടു വ്യത്യാസമുണ്ടായിരുന്നു. ഒരു സൗഹൃദത്തിന്റെ കഥയായാണ് എനിക്കു മുന്നിൽ അവതരിപ്പിച്ചത്. അതു പറഞ്ഞാൽ ഒരു പക്ഷേ ഇതല്ലല്ലോ വല്ലവൻ എന്ന സിനിമ എന്നു വരെ നിങ്ങൾക്കു തോന്നിയേക്കാം. സിനിമ റിലീസായപ്പോഴേക്കും എന്റെ റോളാകെ മാറിപ്പോയിരുന്നു. വല്ലവനെക്കുറിച്ചോർക്കുമ്പോൾ ഇപ്പോഴും നിരാശയാണ് മനസിൽ എന്നായിരുന്നു സന്ധ്യ പറഞ്ഞത്.
