ഈ വർഷം മാർച്ചിൽ റിലീസിനെത്തി പ്രേക്ഷക ഹൃദയം കീഴടക്കിയ ചിത്രമാണ് കപ്പേള. ലോക്ക് ഡൗണ് മൂലം ചിത്രത്തിന് തീയേറ്ററുകളിൽ അധികം ആയുസില്ലായിരുന്നു എങ്കിലും ചിത്രം നെറ്റ്ഫ്ലിക്സിൽ എത്തിയപ്പോൾ ഇരു കൈയും നീട്ടിയാണ് പ്രേക്ഷകർ ചിത്രത്തെ സ്വീകരിച്ചത്.
റോഷൻ മാത്യൂ, ശ്രീനാഥ് ഭാസി, അന്ന ബെൻ എന്നിവരാണ് പ്രധാന വേഷങ്ങൾ ചെയ്തിരിക്കുന്നത്. സഹകഥാപാത്രങ്ങളായെത്തിയ സുധി കോപ്പ, തൻവി റാം, നീൽജ, നവാസ് വള്ളിക്കുന്ന്, സുധീഷ്, നിഷാ സാരംഗ് എന്നിവരും നല്ല പ്രകടനം തന്നെ കാഴ്ചവെച്ചു. ഇവരെക്കൂടാതെ സംവിധായകൻ മുസ്തഫയും ഒരു പ്രധാനവേഷത്തിൽ സിനിമയിലുണ്ട്.
ചിത്രം ഇപ്പോൾ തെലുങ്കിലേക്ക് റീമേക്ക് ചെയ്യാൻ ഒരുങ്ങുകയാണ്. സിത്താര എന്റർടൈന്മെന്റ്‌സ് ആണ് ചിത്രം നിർമ്മിക്കുന്നത്. അല്ലു അർജുന്റെ സൂപ്പർ ഹിറ്റ് ചിത്രമായ അല വൈകുണ്ഠപുരം നിർമിച്ചത് സിത്താര എന്റർടൈന്മെന്റ്‌സ് ആയിരുന്നു. അതോടൊപ്പം നാനിയുടെ ജേഴ്‌സി നിർമിച്ചതും ഇവരാണ്. സിത്താര എന്റർടൈന്മെന്റ്‌സ് റീമേക്ക് ചെയ്യുന്ന മൂന്നാമത്തെ മലയാള ചിത്രമാണ് കപ്പേള. നേരത്തെ പ്രേമം,അയ്യപ്പനും കോശിയും എണീ ചിത്രങ്ങളുടെ റീമേക്ക് അവകാശവും സിത്താര എന്റർടൈന്മെന്റ്‌സ് തന്നെ സ്വന്തമാക്കിയിരുന്നു.
കഥാസ് അൺടോൾഡിന്റെ ബാനറിൽ വിഷ്ണു വേണുവാണ് സിനിമ നിർമ്മിച്ചിരിക്കുന്നത്. പശ്ചാത്തല സംഗീതം സുഷിൻ ശ്യാമിന്റെ കയ്യിൽ ഭദ്രമായിരുന്നു. കപ്പേളയുടെ എഡിറ്റിങ് നിർവഹിച്ചിരിക്കുന്നത് നൗഫൽ അബ്ദുള്ളയാണ്.
