സുരേഷ് ഗോപിയെ നായകനാക്കി നിഥിന്‍ രണ്‍ജി പണിക്കര്‍ ഒരുക്കുന്ന പുതിയ സിനിമയാണ് കാവല്‍. സിനിമയുടെ ഡബ്ബിങ് പൂര്‍ത്തിയാക്കിയതായി സുരേഷ്‌ഗോപി സോഷ്യല്‍മീഡിയയിലൂടെ അറിയിച്ചിരിക്കുകയാണ്.
സുരേഷ് ഗോപി അരയില്‍ തിരുകിയ റിവോള്‍വറുമായി നില്‍ക്കുന്ന ചിത്രവുമായെത്തിയ ടൈറ്റില്‍ ലുക്ക് പോസ്റ്റര്‍ ഏറെ ശ്രദ്ധിക്കപ്പെട്ടിരുന്നു. പിന്നാലെ വന്ന ടീസറും ഇറങ്ങിയിരുന്നു. ഗുഡ്വില്‍ എന്റര്‍ടെയ്ന്‍മെന്റിന്റെ ബാനറില്‍ ജോബി ജോര്‍ജ്ജാണ് ഈ ചിത്രം നിര്‍മ്മിക്കുന്നത്. നിഥിന്‍ രണ്‍ജി പണിക്കര്‍ തിരക്കഥ എഴുതി സംവിധാനം ചെയ്യുന്ന ചിത്രത്തില്‍ ടെയ്ല്‍ എന്‍ഡ് എഴുതുന്നത് രണ്‍ജിപണിക്കര്‍ ആണെന്നും സുരേഷ് ഗോപി പറഞ്ഞിരുന്നു.
ഹൈറേഞ്ച് പശ്ചാത്തലമാക്കിയൊരുക്കുന്ന സിനിമയില്‍ രണ്ടു കാലഘട്ടത്തിന്റെ കഥയാണ് പറയുന്നത്. ആക്ഷന്‍ ഫാമിലി ഡ്രാമ ഗണത്തില്‍ പെടുന്നതാണ് ചിത്രം. നടന്‍ ലാല്‍ ചിത്രത്തില്‍ ശക്തമായ ഒരു കഥാപാത്രത്തെ അവതരിപ്പിക്കുന്നുണ്ട്, സയാ ഡേവിഡാണ് ചിത്രത്തില്‍ മറ്റൊരു മുഖ്യ വേഷത്തിലെത്തുന്നത്.
അലന്‍സിയര്‍, പത്മരാജ് രതീഷ്, ഐ എം വിജയന്‍, സുജിത് ശങ്കര്‍, സന്തോഷ് കീഴാറ്റൂര്‍, കിച്ചു ടെല്ലസ്, ബിനു പപ്പു, മോഹന്‍ ജോസ്, കണ്ണന്‍ രാജന്‍ പി ദേവ്, മുരുകന്‍, മുത്തുമണി എന്നിവരാണ് മറ്റ് അഭിനേതാക്കള്‍. നിഖില്‍ എസ് പ്രവീണാണ് ഛായാഗ്രഹണം. ജോസഫ് എന്ന ചിത്രത്തിലൂടെ ശ്രദ്ധേയനായ സംഗീത സംവിധായകന്‍ രഞ്ജിന്‍ രാജാണ് ചിത്രത്തിലെ ഗാനങ്ങള്‍ക്ക് സംഗീതം ഒരുക്കുന്നത്. മന്‍സൂര്‍ മുത്തൂട്ടി ചിത്രസംയോജനം. കല ദിലീപ് നാഥും മേക്കപ്പ് പ്രദീപ് രംഗനും നിര്‍വ്വഹിക്കുന്നു. നിസ്സാര്‍ ആണ് വസ്ത്രാലങ്കാരം. പ്രൊഡക്ഷന്‍ കണ്ട്രോളര്‍ സഞ്ജയ് പടിയൂര്‍.
