ഇന്ന് തെന്നിന്ത്യൻ സിനിമയിലെ മുൻനിര നായികമാരിൽ ഒരാളാണ് കീർത്തി സുരേഷ്. മലയാളിയായ ഈ താരം, നടി മേനകയുടെയും നിർമ്മാതാവ് ജി സുരേഷ് കുമാറിന്റെയും മകളാണ്. മോഹൻലാൽ- പ്രിയദർശൻ ടീമിന്റെ ഗീതാഞ്ജലിയിലൂടെ നായികയായി അരങ്ങേറ്റം കുറിച്ച കീർത്തി അതിനു ശേഷം കൂടുതലും അഭിനയിച്ചത് അന്യ ഭാഷയിൽ ആണ്. സൂപ്പർ സ്റ്റാർ രജനികാന്ത്, ദളപതി വിജയ്, മെഗാ സ്റ്റാർ ചിരഞ്ജീവി എന്നിവർക്കൊപ്പമെല്ലാം അഭിനയിക്കാൻ സാധിച്ച കീർത്തി മലയാളത്തിലേക്ക് മടങ്ങിയെത്തുന്ന ചിത്രമാണ് മോഹൻലാൽ- പ്രിയദർശൻ ടീമിന്റെ മരക്കാർ അറബിക്കടലിന്റെ സിംഹം എന്ന ബ്രഹ്മാണ്ഡ ചിത്രം. ഡിസംബർ രണ്ടിന് ലോകം മുഴുവൻ റിലീസ് ചെയ്യാൻ പോകുന്ന ഈ ചിത്രത്തെ കുറിച്ച് കീർത്തി പറയുന്ന വാക്കുകൾ ഏറെ ശ്രദ്ധേയമാണ്.
ഈ ചിത്രത്തിന്റെ ഭാഗമാകാൻ സാധിച്ചത് വലിയ ഭാഗ്യം ആണെന്നാണ് കീർത്തി സുരേഷ് പറയുന്നത്. ഇതിൽ ജോലി ചെയ്യാൻ വരുമ്പോൾ സ്വന്തം കുടുംബത്തിലേക്ക് വരുന്ന ഫീൽ ആണെന്നും എല്ലാവരും ചെറുപ്പം തൊട്ടേ അറിയാവുന്ന ആളുകൾ ആണെന്നും കീർത്തി പറഞ്ഞു. മോഹൻലാൽ, പ്രിയദർശൻ എന്നിവർ സുരേഷ് കുമാറിന്റെ ബാല്യകാലത്തെ തൊട്ടുള്ള സുഹൃത്തുക്കളും ഫാമിലി ഫ്രണ്ട്സുമാണ്. മോഹൻലാലിന്റെ മകൻ പ്രണവ് മോഹൻലാൽ, പ്രിയദർശന്റെ മകൾ കല്യാണി എന്നിവരും അതുപോലെ പ്രിയദർശന്റെ കീഴിൽ സംവിധാന സഹായി ആയി കീർത്തിയുടെ ചേച്ചി രേവതിയും ജോലി ചെയ്തിട്ടുണ്ട്. ആർച്ച എന്ന കഥാപാത്രമായി ആണ് കീർത്തി ഇതിൽ അഭിനയിച്ചിരിക്കുന്നത്.
വലിയ താരനിരയാണ് ഇതിൽ അണിനിരക്കുന്നത് എന്നും കീർത്തി പറയുന്നു. മോഹൻലാൽ, പ്രണവ് മോഹൻലാൽ, അർജുൻ സർജ, പ്രഭു, സുനിൽ ഷെട്ടി, അശോക് സെൽവൻ, മഞ്ജു വാര്യർ, കീർത്തി സുരേഷ്, കല്യാണി പ്രിയദർശൻ, സുഹാസിനി, സിദ്ദിഖ്, നെടുമുടി വേണു, സുരേഷ് കൃഷ്ണ, മാമുക്കോയ, ബാബുരാജ്, ഹരീഷ് പേരാടി, മുകേഷ്, ഇന്നസെന്റ്, ഫാസിൽ, ഗണേഷ് കുമാർ, നന്ദു, മണിക്കുട്ടൻ, സന്തോഷ് കീഴാറ്റൂർ, ജി സുരേഷ് കുമാർ എന്നിവരാണ് ഇതിലെ പ്രധാന താരങ്ങൾ. മറ്റൊരു പ്രധാന വേഷം ഇതിൽ ചെയ്തിരിക്കുന്നത് തായ്‌ലാന്റുകാരനായ ജെജെ ആണ്. അദ്ദേഹത്തിന്റെ ജോഡി ആയാണ് കീർത്തി ഇതിൽ എത്തുന്നത്.
