ദിലീപിനെ നായകനാക്കി നാദിര്‍ഷ സംവിധാനം ചെയ്യുന്ന ചിത്രമാണ് ‘കേശു ഈ വീടിന്റെ നാഥന്‍’. ഡിസ്‌നി പ്ലസ് ഹോട്ട് സ്റ്റാറിലൂടെ റിലീസ് ചെയ്ത ചിത്രം മികച്ച പ്രതികരണം നേടി മുന്നേറുകയാണ്. ഇപ്പോഴിതാ ചിത്രത്തിലെ എങ്ങാണ്ടൊക്കെ പോയാലും എന്ന ഗാനം യു ട്യൂബില്‍ റിലീസ് ചെയ്തിരിക്കുകയാണ്. ബി കെ ഹരിനാരായണന്റെ വരികള്‍ക്ക് നാദിര്‍ഷ സംഗീതം നല്‍കിയിരിക്കുന്നു. ഗാനം പാടിയത് കണ്ണൂര്‍ ഷെരീഫാണ്.
അമര്‍ അക്ബര്‍ അന്തോണി, കട്ടപ്പനയിലെ ഋതിക് റോഷന്‍, മേരാ നാം ഷാജി എന്നീ ചിത്രങ്ങള്‍ക്ക് ശേഷം നാദിര്‍ഷ സംവിധാനം ചെയ്യുന്ന ചിത്രമാണ് കേശു ഈ വീടിന്റെ നാഥന്‍. ദിലീപ് നാദിര്‍ഷ കൂട്ടുകെട്ടില്‍ ഒരുങ്ങുന്ന ഫാമിലി കോമഡി ചിത്രമാണ് കേശു ഈ വീടിന്റെ നാഥന്‍. സജീവ് പാഴൂര്‍ ആണ് ചിത്രത്തിന് തിരക്കഥയെഴുതുന്നത്. സിനിമയിലെ ദിലീപിന്റെ മേക്ക്ഓവര്‍ ഏറെ ശ്രദ്ധ നേടിയിരുന്നു.
സിനിമയില്‍ രണ്ട് ഗെറ്റപ്പിലാണ് ദിലീപ് പ്രത്യക്ഷപ്പെടുന്നത്. അതില്‍ തന്നെ ഒന്ന് അറുപതു വയസു കഴിഞ്ഞ കഥാപാത്രമാണ്. ഉര്‍വശി നായികയായി എത്തുന്ന ചിത്രത്തില്‍ സിദ്ദിഖ്, സലിം കുമാര്‍, ഹരിശ്രീ അശോകന്‍, കലാഭവന്‍ ഷാജോണ്‍, ഹരീഷ് കണാരന്‍, ശ്രീജിത്ത് രവി, ജാഫര്‍ ഇടുക്കി, കോട്ടയം നസീര്‍, അനുശ്രീ, സ്വാസിക എന്നിവരും പ്രധാനവേഷത്തില്‍ അഭിനയിക്കുന്നുണ്ട്. അനില്‍ നായരാണ് ഛായാഗ്രഹണം. ബി കെ ഹരിനാരായണന്‍, ജ്യോതിഷ്, നാദിര്‍ഷ എന്നിവരുടെ വരികള്‍ക്ക് സംഗീതം നല്‍കിയിരിക്കുന്നത് നാദിര്‍ഷ തന്നെയാണ്. കുടുംബ പശ്ചാത്തലത്തില്‍ ഹാസ്യത്തില്‍ കലര്‍ന്ന കഥയാണ് സിനിമ പറയുന്നത്.
