കഴിഞ്ഞ ജൂൺ മാസത്തിൽ മലയാള സിനിമയ്ക്കു ആദരമായി കൊച്ചി മെട്രോയുടെ വൈറ്റില സ്റ്റേഷൻ ഒരുക്കാൻ കൊച്ചിൻ മെട്രോ റെയിൽ ലിമിറ്റഡ് തീരുമാനിച്ചു. ദേശത്തിന്റെയും ഭാഷയുടെയും അതിർവരമ്പുകൾ ഭേദിച്ചു കൊണ്ട് വളർന്നു കൊണ്ടിരിക്കുന്ന മലയാള സിനിമയ്ക്ക് ആദരം നൽകുക എന്ന ലക്ഷ്യത്തോടെയാണ് ഇവർ ഈ പ്ലാൻ ആവിഷ്കരിച്ചത്. വെറും മൂന്നു മാസങ്ങൾ കൊണ്ട് ആ കർമ്മം പൂർത്തിയായിരിക്കുകയാണ്.
മോഹൻലാൽ, മമ്മൂട്ടി എന്നീ സൂപ്പർ താരങ്ങൾ ഉൾപ്പെടെ ഉള്ള മലയാളത്തിലെ പ്രമുഖ നടീനടന്മാരുടെ എല്ലാം വിവിധ കഥാപാത്രങ്ങൾ ആണ് വൈറ്റില സ്റ്റേഷന്റെ ചുവരുകളെ മനോഹരമാക്കുന്നത്. അവിടെ വന്നു പോകുന്ന യാത്രക്കാരിലെല്ലാം കൗതുകം നിറയ്ക്കുന്ന രീതിയിലാണ് ഈ ചിത്രങ്ങൾ ഒരുക്കിയിരിക്കുന്നത്. ഈ പദ്ധതി ആവിഷ്കരിക്കുവാൻ ആയി ജൂൺ മാസത്തിൽ നടന്ന ചർച്ചയിൽ ‘അമ്മ സെക്രട്ടറി ഇടവേള ബാബു, പ്രശസ്ത സിനിമാ നിരൂപകൻ ആയ മനീഷ് നാരായണൻ, ലിജിൻ ജോസ്, സിനിമ പാരഡിസോ ക്ലബ് പ്രവർത്തകർ തുടങ്ങി ഒട്ടേറെ പേർ പങ്കെടുത്തിരുന്നു. ഇപ്പോൾ അണിയിച്ചൊരുക്കിയ ചിത്രങ്ങൾക്കൊപ്പം തന്നെ മലയാള സിനിമയുമായി ബന്ധപ്പെട്ട എക്സ്ക്ലൂസീവ് ലോഞ്ചുകൾ നടത്താനുള്ള സൗകര്യം കൂടി വൈറ്റില മെട്രോ സ്റ്റേഷന്റെ ഭാഗം ആവും എന്നുള്ള വിവരങ്ങൾ ആണ് ലഭിക്കുന്നത്.
