തെലുങ്ക് സൂപ്പർ സ്‌റ്റാറിനൊപ്പം കുറച്ചു കാലം സമയം പങ്കിട്ടിട്ടുള്ളതിന്റെ ഓർമകൾ പങ്കുവെച്ച് കുണ്ടറ ജോണി. കാൻ ചാനലിന് നൽകിയ അഭിമുഖത്തിലാണ് കുണ്ടറ ജോണി ഇക്കാര്യങ്ങൾ വെളിപ്പെടുത്തിയത്. ഷൂട്ടിംഗുമായി ബന്ധപ്പെട്ട് മദ്രാസ് ആർ കെ ലോഡ്ജിൽ താമസിക്കുന്ന സമയത്ത് ആയിരുന്നു ചിരഞ്ജീവിയെ കാണുന്നത്. അന്ന് അദ്ദേഹം അത്ര പ്രശസ്തൻ ഒന്നുമല്ലായിരുന്നെന്നും ജോണി പറഞ്ഞു.
‘അന്ന് ഒരേ നിലയിൽ ആയിരുന്നു ഞങ്ങൾ താമസിച്ചിരുന്നത്. ഞാന്‍ ആര്‍ കെ ലോഡ്ജിലെ 44ാം നമ്പര്‍ മുറിയിലും, ചിരഞ്ജീവി 41ാം നമ്പര്‍ മുറിയിലും ആയിരുന്നു താമസം. പുള്ളി അന്ന് അത്രയ്ക്ക് ഫേമസ് അല്ല, എന്നാലും രാവിലെ എഴുന്നേറ്റ് ടെറസില്‍ പോയി എക്‌സസര്‍സൈസ് ഒക്കെ ചെയ്യാറുണ്ടായിരുന്നു. അദ്ദേഹം അന്നും ഇന്നത്തെ പോലെ ബോഡി മെയ്‌ന്റൈന്‍ ചെയ്യുമായിരുന്നു.’ – ചിരഞ്ജീവിയെ നേരിട്ട കണ്ട ഓർമകൾ കുണ്ടറ ജോണി പങ്കുവെച്ചത് ഇങ്ങനെ. ‘കോണിപ്പടി കയറി വരുമ്പോൾ തന്നെ കാണുന്നത് ചിരഞ്ജീവിയുടെ മുറി ആയിരുന്നു. അന്ന് പുറത്തു പോയി വരുമ്പോൾ നാന പോലെയുള്ള പ്രസിദ്ധീകരണങ്ങൾ വാങ്ങി വരുമായിരുന്നു. ഞാൻ ഇതുമായി പോകുമ്പോൾ സാർ കൊടുങ്കോ എന്ന് പറഞ്ഞ് ചിരഞ്ജീവി അത് വാങ്ങും. എന്റെ ഫോട്ടോ കാണുമ്പോൾ സാർ ഉങ്കളുടെ ഫോട്ടോ എന്ന് പറഞ്ഞ് കാണിച്ചു തരും’ – ചിരഞ്ജീവിയുമായി പങ്കിട്ട നിമിഷങ്ങൾ നടൻ ജോണി ഓർത്തെടുത്തു.
സിനിമാവിശേഷങ്ങളൊക്കെ ചിരഞ്ജീവി ചോദിക്കുമായിരുന്നെന്നും ജോണി ഓർക്കുന്നു. അന്ന് അദ്ദേഹം വളർന്നു വരുന്ന സമയമായിരുന്നു. കാണുമ്പോഴൊക്കെ വിശേഷം ചോദിച്ചും സംസാരിച്ചും എപ്പോഴും ഒപ്പമുണ്ടാകും. പിന്നെ പിന്നെ പിടിച്ചാൽ കിട്ടാത്ത തരത്തിലേക്ക് ചിരഞ്ജീവി വളർന്നെന്നും ജോണി പറഞ്ഞു.
