ആസിഫ് അലി നായകനായി എത്തുന്ന പുതിയ ചിത്രം ‘കുഞ്ഞെൽദോ’ ഡിസംബർ 24ന് റിലീസ് ചെയ്യും. തിയറ്ററുകളിലാണ് ചിത്രം റിലീസ് ചെയ്യുന്നത്. ആർ ജെ മാത്തുക്കുട്ടി ആണ് കുഞ്ഞെൽദോ സംവിധാനം ചെയ്യുന്നത്. വിനീത് ശ്രീനിവാസൻ ഈ ചിത്രത്തിൽ ക്രിയേറ്റീവ് ഡയറക്ടറായി സഹകരിക്കുന്നു എന്ന പ്രത്യേകതയും ഉണ്ട്.
നീണ്ട ഇടവേളയ്ക്ക് ശേഷം ആ ദിനങ്ങൾ വീണ്ടും വരുന്നു എന്ന ടാഗ് ലൈനോടെ ആയിരുന്നു കുഞ്ഞെൽദോയുടെ ടീസർ പുറത്തു വിട്ടത്. ക്രിസ്മസ് രാത്രിയിൽ ‘കുഞ്ഞെൽദോ’ തിയറ്ററുകളിലേക്ക് എത്തും. കോളേജ് പശ്ചാത്തമാക്കിയുള്ള ഒരു കഥയാണ് ചിത്രം പറയുന്നത്. സുധീഷ്, സിദ്ദിഖ്, അര്‍ജ്ജുന്‍ ഗോപാല്‍, നിസ്താര്‍ സേട്ട്, രാജേഷ് ശര്‍മ്മ, കോട്ടയം പ്രദീപ്, മിഥുന്‍ എം ദാസ്, കൃതിക പ്രദീപ് തുടങ്ങിയവരാണ് മറ്റു താരങ്ങള്‍.
ചിത്രം നിർമിച്ചിരിക്കുന്നത് ലിറ്റില്‍ ബിഗ് ഫിലിംസിന്റെ ബാനറില്‍ സുവിന്‍ കെ വര്‍ക്കിയും പ്രശോഭ് കൃഷ്ണയും ചേര്‍ന്നാണ്. നേരത്തെ കുഞ്ഞിരാമായണം, എബി, കൽക്കി എന്നീ ചിത്രങ്ങൾ ഈ ബാനർ നിർമിച്ചിരുന്നു. സ്വരൂപ് ഫിലിപ്പ് – ഛായാഗ്രഹണം. രഞ്ജന്‍ എബ്രഹാം – എഡിറ്റിംഗ്. രാജേഷ് അടൂർ – ചീഫ് അസോസിയേറ്റ് ഡയറക്ടര്‍.
