നാലാം വാരവും നിറഞ്ഞ സദസിൽ പ്രദർശനം തുടർന്ന് ദുൽഖർ സൽമാൻ ചിത്രം കുറുപ്. നവംബർ 12ന് ആയിരുന്നു കുറുപ് റിലീസ് ചെയ്തത്. മികച്ച പ്രതികരണമായിരുന്നു ചിത്രത്തിന് ഉണ്ടായത്. ശ്രീനാഥ് രാജേന്ദ്രൻ സംവിധാനം ചെയ്ത ചിത്രം തിയറ്ററിൽ മികച്ച വിജയം സ്വന്തമാക്കി. നാലാം വാരവും തുടരുന്ന ഹൗസ്ഫുൾ ഷോകൾ തന്നെ ഇതിന് ഉദാഹരണമാണ്. കോവിഡ് കാലഘട്ടത്തിനു ശേഷം തിയറ്ററുകളിലേക്ക് എത്തുന്ന ആദ്യ വലിയ ചിത്രം എന്ന പ്രത്യേകതയോടെയാണ് കുറുപ് എത്തിയത്. അതുകൊണ്ട് തന്നെ പ്രേക്ഷകർ തിയറ്ററിലേക്ക് എത്തുമോ എന്ന വലിയ ആശങ്കയും ഉണ്ടായിരുന്നു. എന്നാൽ, ആ ആശങ്കയെ അസ്ഥാനത്താക്കി പ്രേക്ഷകർ തിയറ്ററുകളിലേക്ക് എത്തുന്ന കാഴ്ച കുറുപ് മലയാള സിനിമയ്ക്ക് കാണിച്ചു കൊടുത്തു.
അതേസമയം, കുറുപ് ഇതിനകം 75 കോടി ക്ലബിൽ ഇടം പിടിച്ചതായി അണിയറപ്രവർത്തകർ അറിയിച്ചു. മോഹൻലാൽ നായകനായ നൂറു കോടി ക്ലബിൽ ഇടം പിടിച്ച, പുലി മുരുകൻ, ലൂസിഫർ ഇനീ ചിത്രങ്ങൾക്ക് ശേഷം ആദ്യമായാണ് ഒരു മലയാള ചിത്രം 75 കോടി എന്ന സംഖ്യ ആഗോള കളക്ഷൻ ആയി നേടുന്നത് എന്ന പ്രത്യേകതയും ഉണ്ട്. ഇതിനിടയിൽ റിലീസിന് മുമ്പ് തന്നെ മരക്കാർ 100 കോടി സ്വന്തമാക്കിയതായി അണിയറ പ്രവർത്തകർ അറിയിച്ചിരുന്നു.
വിദേശ മാർക്കറ്റിൽ ചിത്രത്തിന് ലഭിച്ച വമ്പൻ റിലീസ് ആണ് ഇത്ര ചെറിയ സമയത്ത് തന്നെ ഇത്രയും വലിയ തുക സ്വന്തമാക്കാൻ സഹായിച്ചത്. കൂടുതൽ ഷോകൾ കുറഞ്ഞ ദിവസം കൊണ്ട് കളിച്ചു, കൂടുതൽ സ്‌ക്രീനിൽ നിന്ന് ഏറ്റവും കൂടുതൽ പണം വാരുക എന്ന രീതിയാണ് കുറുപ്പ് പിന്തുടർന്നത്. മലയാളം കൂടാതെ തമിഴ്, തെലുങ്ക് ഉൾപ്പെടെ മറ്റ് ഇന്ത്യൻ ഭാഷകളിലും കുറുപ് റിലീസ് ചെയ്തിരുന്നു.
