നടനും നിർമ്മാതാവും സംവിധായകനുമായ ലാലും മകൻ ജീൻ പോള്‍ ലാലും ഒരുക്കുന്ന ‘Tസുനാമി’യ്ക്കായി കാത്തിരിപ്പിലാണെന്നറിയിച്ച് പ്രിയതാരം അജു വര്‍ഗ്ഗീസ് ചിത്രത്തിൻ്റെ ലൊക്കേഷനിൽ നിന്നുള്ള ചിത്രം സോഷ്യൽ മീഡിയയിലൂടെ ആരാധകരുമായി പങ്കുവെച്ചിട്ടുണ്ട്. അച്ഛൻ മകൻ കോമ്പോയിൽ ഒരുങ്ങുന്ന പുത്തൻ ചിത്രത്തിൻ്റെ ലൊക്കേഷൻ ചിത്രത്തിൽ നടന്മാരും സംവിധായകരുമായ അച്ഛനും മകനും ഷൂട്ടിനിടെ നടത്തുന്ന ചര്‍ച്ചയാണ് കാണുന്നത്.
പാണ്ട ഡാഡ് പ്രൊഡക്ഷൻസിന്‍റെ ബാനറില്‍ അലന്‍ ആന്‍റണി നിർമ്മിക്കുന്ന ഈ ചിത്രത്തിന് തിരക്കഥയൊരുക്കുന്നത് ലാലും സംവിധാനം ചെയ്യുന്നത് ലാലിൻ്റെ മകനും നടനുമൊക്കെയായി തൻ്റെ കഴിവ് തെളിയിച്ചിട്ടുള്ള ലാല്‍ ജൂനിയറുമാണ്. അച്ഛനും മകനും ഒരുമിച്ച് സംവിധാനം ചെയ്യുന്ന ചിത്രത്തില്‍ അഭിനയിക്കുന്നതിന്റെ സന്തോഷം പങ്കുവെച്ചിരിക്കുകയാണ് അജു വര്‍ഗീസ് ഇപ്പോൾ. ‘ആദ്യമായാണ് ഒരു അച്ഛനും മകനും ഒരുമിച്ച് സംവിധാനം ചെയ്യുന്നത്! സ്‌നേഹം. എ ലാല്‍ ആന്‍ഡ് ജൂനിയര്‍ ഫിലിം’, ഇരുവരുടെയും ചിത്രം അടങ്ങുന്ന പോസ്റ്റര്‍ പങ്കുവെച്ചുകൊണ്ട് അജു കുറിച്ചത് ഇങ്ങനെയാണ്.
