അമ്പിളിദേവിയുടെയും ആദിത്യന്റെയും വിവാഹം വഴി തെളിച്ചിരിക്കുന്നത് വമ്പൻ വിവാദങ്ങളിലേക്കാണ്. ആദിത്യന്റെ നാലാമത്തെ വിവാഹമാണെന്ന പ്രചാരണത്തോടെ തുടങ്ങിയ വിവാദം, അമ്പിളിയുടെ മുൻഭർത്താവ് ലോവൽ ഷൂട്ടിംഗ് സൈറ്റിൽ കേക്ക് മുറിച്ച് ആഘോഷിച്ചതോടെ കൂടുതൽ വിവാദമായി. ലോവലിനെതിരെ ആദിത്യനും അമ്പിളിയും രംഗത്തെത്തി. ഇപ്പോൾ തന്റെ കുടുംബജീവിതം തകർത്തത് ആദിത്യൻ ആണെന്ന വെളിപ്പെടുത്തൽ നടത്തിയിരിക്കുകയാണ് ലോവൽ.
“ഇപ്പോഴും അതിനൊരു കൃത്യമായ മറുപടി പറയാൻ എനിക്ക് അറിയില്ല. എല്ലാ ദമ്പതിമാർക്കും ഇടയിലും ഉണ്ടാവില്ലേ ചെറിയ സൗന്ദര്യപ്പിണക്കങ്ങൾ. പിന്നെ, എനിക്ക് സ്വഭാവദൂഷ്യം ഉണ്ടെന്നും മറ്റു സ്ത്രീകളുമായി ബന്ധമുണ്ടെന്നും പുറത്തു നിന്നു പലരും അമ്പിളിയെ വിളിച്ചു പറഞ്ഞു. ജീവിതം തകർക്കാൻ ചിലർ വച്ച പാരകൾ.” ലോവൽ വെളിപ്പെടുത്തി.
ആ കൂട്ടത്തിൽ ആദിത്യനും ഉണ്ടോയെന്ന ചോദ്യത്തിന് ലോവലിന്റെ മറുപടി ഇപ്രകാരമായിരുന്നു. “തീർച്ചയായും. എന്റെ കുടുംബ ജീവിതം തകർക്കാൻ ഏറ്റവും കൂടുതൽ കളിച്ചത് ആദിത്യൻ തന്നെയാണ്. അയാൾക്ക് അമ്പിളിയെ പണ്ടേ ഇഷ്ടമായിരുന്നു. കല്യാണം കഴിക്കണമെന്ന് ആഗ്രഹിക്കുകയും ചെയ്തിരുന്നു. അത് തുറന്നു പറഞ്ഞിട്ടുമുണ്ട്. അയാളുടെ ആഗ്രഹം സാധിക്കുന്നതിനു വേണ്ടി എനിക്കെതിരെ അപവാദ പ്രചരണങ്ങൾ നടത്തി. അതിൽ അയാൾ വിജയിച്ചിരിക്കുന്നു. ജീവിതം നഷ്ടപ്പെട്ടത് എനിക്കും.”
ദാമ്പത്യം തകർത്തതിന് പിന്നിൽ ആദിത്യൻ ആണെന്ന് തെളിയിക്കാൻ തന്റെ ജീവിതത്തിൽ നടന്ന ഒരു സംഭവവും ലോവൽ പറഞ്ഞു. “അടുത്തിടെ നടന്ന ഒരു സംഭവം ഞാൻ പറയാം. ഷൂട്ടിങ് സെറ്റിൽ കയറി ഏതോ ഗുണ്ടകൾ അമ്പിളിയെ ഭീഷണിപ്പെടുത്തി. എന്റെ ആളുകൾ എന്ന വ്യാജേന എത്തിയ അവരെ അയച്ചത് സത്യത്തിൽ ആദിത്യനായിരുന്നു. പക്ഷേ, പഴി എന്റെ തലയിൽ വീണു. അമ്പിളി കേസ് കൊടുത്തു. ചോറ്റാനിക്കര പൊലീസ് സ്റ്റേഷനിൽ കയറി ഇറങ്ങേണ്ട അവസ്ഥ എനിക്ക് ഉണ്ടായി. എനിക്കെതിരെ സാക്ഷി പറയാൻ വന്നവരൊക്കെ ആദിത്യന്റെ നാട്ടുകാർ. അതായത് എറണാകുളത്ത് നടന്നു എന്നു പറയപ്പെടുന്ന സംഭവത്തിനു സാക്ഷികൾ കൊല്ലത്തു നിന്ന്. അതോടെ പൊലീസിനു കാര്യങ്ങളുടെ നിജസ്ഥിതി വ്യക്തമായി. എസ്.ഐ എന്നോട് പറഞ്ഞു; ‘അനിയാ ഇത് കള്ളക്കേസാ, ആ സ്ത്രീയെ അവരുടെ പാട്ടിന് വിട്ടേക്കൂ’ എന്ന്. മറ്റുള്ളവരെ പഴിചാരിയുള്ള ഇത്തരം വൃത്തികെട്ട കളികൾ ആദിത്യന്റെ സ്ഥിരം നമ്പറുകളിൽ ഒന്നാണ്. സീരിയൽ രംഗത്തെ പലരും അതിന് ഇര ആയിട്ടുമുണ്ട്.”
