വ്യത്യസ്തതയാർന്ന ചിത്രങ്ങളിലൂടെ പ്രേക്ഷക ഹൃദയം കീഴടക്കിയ സംവിധായകനാണ് ലിജോ ജോസ് പെല്ലിശ്ശേരി. ദേശീയ തലത്തിലും അന്തർദേശീയ തലത്തിലും വരെ അദ്ദേഹം ശ്രദ്ധ നേടിയെടുത്തു. പുതിയ ചിത്രം തുടങ്ങുന്നതിനെ പറ്റി മലയാളം ഇൻഡസ്ട്രിയിൽ തർക്കങ്ങൾ നിലനിൽക്കുന്ന ഈ വേളയിൽ തന്റെ പ്രതികരണവുമായി രംഗത്തെത്തിയിരിക്കുകയാണ് ലിജോ ജോസ് പെല്ലിശ്ശേരി.
ലിജോ ജോസ് പെല്ലിശ്ശേരി സമൂഹമാധ്യമങ്ങളിലൂടെ പങ്കുവെച്ച ഒരു പോസ്റ്റ് ഇന്നലെ സോഷ്യൽ മീഡിയയിൽ വൈറലായിരുന്നു. ‘ഞാനൊരു സിനിമ പിടിക്കാൻ പോകുവാടാ ആരാടാ തടയാൻ’ എന്ന് അദ്ദേഹം ഫെയ്സ്ബുക്ക് പോസ്റ്റിലൂടെ ചോദിക്കുന്നു. ലോക്ക് ഡൗൺ നിയന്ത്രണങ്ങൾക്ക് ഇളവ് പ്രഖ്യാപിച്ചപ്പോൾ വിവിധ സിനിമാപ്രവർത്തകർ ഷൂട്ടിംഗ് ആരംഭിക്കുവാൻ തയ്യാറായെങ്കിലും പ്രൊഡ്യൂസേഴ്സ് അസോസിയേഷൻ ഇതിനെ എതിർത്ത് രംഗത്തുവന്നിരുന്നു. ഇതിനെതിരെയാണ് ലിജോ ജോസ് പെല്ലിശ്ശേരിയുടെ പോസ്റ്റ്. പ്രൊഡ്യൂസേഴ്സ് അസോസിയേഷന് എതിരെയുള്ള മറുപടിയാണ് ഇത് എന്ന് കമന്റുകൾ സൂചിപ്പിക്കുന്നു. സംവിധായകനായ മിഥുൻ മാനുവൽ കമന്റ് ബോക്സിൽ പറയുന്നത് ‘ആരും തടയില്ല ആശാൻ പിടിക്ക്’ എന്നാണ്. ഇതിനിടെ ചിലർ ‘ആരാടാ തടയാൻ’ സിനിമയുടെ പേരാണോ എന്ന് ചോദിച്ചിരുന്നു. ഇപ്പോൾ അതിൽ മറുപടി പറയുകയാണ് പെല്ലിശ്ശേരി. ‘സിനിമ പേരല്ല
തീരുമാനമാണ്’ എന്നാണ് അദ്ദേഹം കുറിച്ചത്.
നടൻ വിനയ് ഫോർട്ട് ഉൾപ്പെടെ നിരവധി വ്യക്തികളാണ് ലിജോ ജോസ് പെല്ലിശ്ശേരിയെ പിന്തുണച്ചുകൊണ്ട് രംഗത്തെത്തിയിരിക്കുന്നത്. കൊറോണ ഭീതി മൂലം നിർത്തിവെച്ച അറുപതോളം ചിത്രങ്ങളുടെ ചിത്രീകരണം പൂർത്തിയായതിനു ശേഷം മാത്രമേ പുതിയ ചിത്രങ്ങൾ ചെയ്യാവൂ എന്നായിരുന്നു തീരുമാനം.
