ലോകകപ്പില്‍ അര്‍ജന്റീനയുടെ വിജയം ലോകമെമ്പാടും ആഘോഷിക്കുകയാണ്. ഫ്രാന്‍സായിരുന്നു അര്‍ജന്റീനയുടെ എതിരാളി. ലിയോണല്‍ മെസ്സിയുടെ കരിയറിലെ പൊന്‍തൂവലാണ് ഈ ലോകകപ്പ് കിരീടം. ഇത് താരവും സഹതാരങ്ങളും മതിമറന്ന് ആഘോഷമാക്കി. നിക്കോളാസ് ഓട്ടാമെന്‍ഡിയാണ് ഇതിന്റെ വിഡിയോ ആരാധകര്‍ക്കായി പങ്കുവച്ചത്.
View this post on Instagram
ലോകകപ്പ് ട്രോഫിയുമായി ഡ്രെസ്സിംഗ് റൂമിലെത്തിയ മെസ്സി മേശയുടെ മുകളിലേക്ക് കയറുമ്പോള്‍ അര്‍ജന്റീന ക്യാമ്പ് മുഴുവന്‍ ആഘോഷതിമിര്‍പ്പിലായിരുന്നു. ലൗട്ടാരോ മാര്‍ട്ടിനെസും മെസ്സിയും ട്രോഫിയുമായി മേശയ്ക്ക് മുകളില്‍ നൃത്തം ചെയ്യുകയായിരുന്നു. എയ്ഞ്ചല്‍ ഡി മരിയ, സെര്‍ജിയോ അഗ്യൂറോയ് തുടങ്ങിയവരും വിഡിയോയില്‍ തല കാണിക്കുന്നുണ്ട്. ഈ സമയം അര്‍ജന്റീനന്‍ താരങ്ങള്‍ പാട്ടുപാടി ആഘോഷിക്കുന്നതും വിഡിയോയില്‍ കാണാം.
ഗ്രൂപ്പ് മത്സരത്തില്‍ സൗദി അറേബ്യയോട് ഞെട്ടിക്കുന്ന തോല്‍വി വഴങ്ങിയ ശേഷമാണ് അര്‍ജന്റീന വമ്പന്‍ തിരിച്ചുവരവ് നടത്തിയത്. നിശ്ചിത സമയത്തും അധിക സമയത്തും ഇരുടീമുകളും മൂന്ന് ഗോള്‍ വീതം നേടിയതോടെയാണ് കിരീടം നിര്‍ണയിക്കാന്‍ പെനാല്‍റ്റി ഷൂട്ടൗട്ടിലേക്ക് കടന്നത്. ഷൂട്ടൗട്ടില്‍ അര്‍ജന്റീന നാലും ഫ്രാന്‍സ് രണ്ട് ഗോളുമാണ് നേടിയത്. ഇതോടെ വിജയം അര്‍ജന്റീനയ്ക്ക് സ്വന്തമാകുകയായിരുന്നു.
