ലിറ്റിൽ ബിഗ് ഫിലിംസിന്റെ പുതിയ ചിത്രത്തിന്റെ ഫസ്റ്റ് ലുക്ക് വ്യാഴാഴ്ച പുറത്തിറക്കും. ലിറ്റിൽ ബിഗ് ഫിലിംസിന്റെ യുട്യൂബ് ചാനൽ വഴി പുറത്തിറക്കിയ രസകരമായ വീഡിയോയിലൂടെയാണ് ഇക്കാര്യം അറിയിച്ചത്. അസമയത്ത് മുകേഷിന് എത്തുന്ന ഒരു ഫോൺ കോൾ വഴിയാണ് ഇക്കാര്യം അവതരിപ്പിക്കുന്നത്. പപ്പ – മകൻ സംഭാഷണരീതിയിലാണ് ഇത്. മകൻ ഫുട്ബോൾ മാച്ച് കണ്ടു കൊണ്ടിരിക്കുന്നതിനിടയിൽ ആണ് മുകേഷിന്റെ ഫോൺ ബെൽ അടിക്കുന്നത്.
‘ഈ അസമയത്തിത് ഇവന്മാര് ആരിത് വിളിക്കുന്നു’ എന്ന ആശങ്കയോടെയാണ് മുകേഷ് ഫോൺ എടുക്കുന്നത്. പത്താം ക്ലാസിൽ പഠിക്കുന്ന ഒരു സ്റ്റുഡന്റാണ് വിളിക്കുന്നത്. ഓഡിഷൻ കോൾ കണ്ടിട്ട് വിളിച്ചതാണെന്നും ഡയറക്ടറെ വിളിച്ചപ്പോൾ സ്വിച്ച് ഓഫ് ആണെന്നുമായിരുന്നു മുകേഷിന്റെ ചോദ്യത്തിന് വിദ്യാർത്ഥിയുടെ മറുപടി. താൻ സ്കേറ്റ് ചെയ്യും, ചെസ് കളിക്കും എന്ന് പറയുമ്പോൾ 18 വയസുള്ള പെൺകുട്ടിയെ ആണ് ആവശ്യമെന്ന് മുകേഷ് അറിയിക്കുന്നു. അപ്പോൾ പെൺകുട്ടിയുടെ കാമുകനായിട്ടെങ്കിലും ഒരു വേഷം തന്നാൽ മതിയെന്നാണ് ഫോൺ വിളിച്ച കുട്ടിയുടെ ആവശ്യം. ഇതുകേട്ട മുകേഷ് വെക്കല്ലേയെന്നും ഒന്ന് കണക്ട് ചെയ്തോട്ടെയെന്നും പറയുന്നു. എന്നാൽ മുകേഷ് സൈബർ സെല്ലിൽ വിളിക്കുകയാണെന്ന് കരുതി ഫോൺ വിളിച്ച കുട്ടി കോൾ കട്ട് ചെയ്തു പോകുന്നു.
തുടർന്ന് മകനോട് അഭിനയിക്കാനുള്ള പെൺകുട്ടിയെ ഇതുവരെ കിട്ടിയില്ലേയെന്ന് ചോദിക്കുന്നു. അതൊക്കെ എപ്പഴേ കിട്ടിയെന്നായിരുന്നു മകന്റെ മറുപടി. എന്നാൽ പിന്നെ എന്തിനാണ് നോക്കി നിൽക്കുന്നതെന്നും തട്ടി പോസ്റ്ററിൽ കേറ്റാൻ പറയെന്നും മുകേഷ് പറയുന്നിടത്താണ് വീഡിയോ അവസാനിക്കുന്നത്. നാളെ വൈകുന്നേരം ഏഴു മണിക്കാണ് ഫസ്റ്റ് ലുക്ക് പോസ്റ്റർ റിലീസ്.
