ജൂണ്‍ എന്ന ചിത്രത്തിന് ശേഷം അഹമ്മദ് ഖബീര്‍ കഥയെഴുതി സംവിധാനം ചെയ്യുന്ന ‘മധുര’ത്തിന് മികച്ച പ്രേക്ഷകപ്രതികരണം. തന്റെ രണ്ടാമത്തെ ചിത്രത്തിലും പുതുമയും വ്യത്യസ്തതയും കൊണ്ടുവരുന്നതില്‍ പൂര്‍ണമായും വിജയിച്ചിരിക്കുകയാണ് സംവിധായകനെന്നാണ് പല പ്രേക്ഷകരുടേയും അഭിപ്രായം. വളരെ ലളിതമായ ഒരു വിഷയം ഹൃദയസ്പര്‍ശിയായി അവതരിപ്പിച്ചതില്‍ തിരക്കഥാകൃത്തുക്കളായ ആഷിക് ഐമര്‍, ഫാഹിം സഫര്‍ എന്നിവര്‍ പ്രത്യേകം കയ്യടി അര്‍ഹിക്കുന്നു. നടന്‍ ജോജു ജോര്‍ജ്ജ്, സിജോ വടക്കന്‍ എന്നിവര്‍ ചേര്‍ന്നാണ് ചിത്രം നിര്‍മിച്ചിരിക്കുന്നത്. സോണി ലിവ് ഒടിടി പ്ലാറ്റ്‌ഫോമിലൂടെയാണ് ചിത്രം റിലീസ് ചെയ്തിരിക്കുന്നത്.
ഒരു സര്‍ക്കാര്‍ മെഡിക്കല്‍ കോളേജിന്റെ പശ്ചാത്തലത്തിലാണ് ചിത്രം കഥ പറയുന്നത്. ഉറ്റവര്‍ക്ക് വേണ്ടി കൂട്ടുകിടക്കാന്‍ (ബൈ സ്റ്റാന്‍ഡേഴ്‌സ്) ആശുപത്രിയിലെത്തുന്ന ഏതാനും വ്യക്തികളില്‍ ഉടലെടുക്കുന്ന സൗഹൃദവും ആത്മബന്ധവുമാണ് ചിത്രത്തിന്റെ പ്രമേയം. ജോജു അവതരിപ്പിക്കുന്ന സാബു, ഇന്ദ്രന്‍സിന്റെ രവി, അര്‍ജുന്‍ അശോകന്റെ കെവിന്‍ എന്നിവരാണ് ചിത്രത്തിലെ കേന്ദ്രകഥാപാത്രങ്ങള്‍. ശ്രുതി രാമചന്ദ്രന്‍, നിഖില വിമല്‍, ജഗദീഷ്, ജാഫര്‍ ഇടുക്കി, നവാസ് വള്ളിക്കുന്ന് എന്നിവരാണ് മറ്റു പ്രധാനകഥാപാത്രങ്ങളെ അവതരിപ്പിച്ചിരിക്കുന്നത്.
ചിത്രത്തിന് ക്യാമറ ചലിപ്പിക്കുന്നത് ജിതിന്‍ സ്റ്റാനിസ്ലാസ് ആണ്.. ആഷിക് ഐമര്‍, ഫാഹിം സഫര്‍ എന്നിവര്‍ ചേര്‍ന്നാണ് സിനിമയുടെ തിരക്കഥ നിര്‍വ്വഹിക്കുന്നത്. വിനായക് ശശികുമാറിന്റെ വരികള്‍ക്ക് ഹിഷാം അബ്ദുള്‍ വഹാബ് ആണ് സംഗീതം നല്‍കിയിരിക്കുന്നത്.
