നിവിൻ പോളി എന്ന സൂപ്പർ നായകനെയും വിനീത് ശ്രീനിവാസൻ കഴിവുറ്റ സംവിധായകനെയും അജു വർഗീസ്, ഭഗത് മാനുവൽ, ഹരികൃഷ്ണൻ, ദീപക് പറമ്പോൽ എന്നിങ്ങനെ നിരവധി താരങ്ങളെയും മലയാളത്തിന് സമ്മാനിച്ച ചിത്രമാണ് 2010ൽ പുറത്തിറങ്ങിയ മലർവാടി ആർട്സ് ക്ലബ് എന്ന ചിത്രം. പ്രകാശനും സന്തോഷും കുട്ടുവും പുരുഷുവും പ്രവീണും അടങ്ങിയ മലർവാടിക്കൂട്ടം ഇന്നും പ്രേക്ഷകരുടെ പ്രിയപ്പെട്ട ഒരു ഗ്യാങ് തന്നെയാണ്. 9 വർഷങ്ങൾക്കിപ്പുറം മലർവാടിക്കൂട്ടവും അവരുടെ കൂടെയുണ്ടായിരുന്നവരും വീണ്ടും ഒന്നിക്കുകയാണ്. അജു വർഗീസ് നിർമാതാവ് കൂടിയാകുന്ന ലൗ ആക്ഷൻ ഡ്രാമയിലൂടെയാണ് അവർ എല്ലാവരും വീണ്ടും എത്തുന്നത്. മലർവാടി ആർട്സ് ക്ലബ്ബിന്റെ തിരക്കഥയും സംവിധാനവും വിനീത് ശ്രീനിവാസനും ലൗ ആക്ഷൻ ഡ്രാമയുടെ തിരക്കഥയും സംവിധാനവും വിനീതിന്റെ അനുജൻ ധ്യാൻ ശ്രീനിവാസനുമാണ് എന്നൊരു പ്രത്യേകത കൂടി ചിത്രത്തിനുണ്ട്. ലേഡി സൂപ്പർസ്റ്റാർ നയൻതാരയാണ് ചിത്രത്തിലെ നായിക.
സാമ്പത്തിക അടിത്തറയുള്ള നാട്ടിലെ ഉയർന്ന കുടുംബാംഗമാണ് ദിനേശൻ. ഒരു വിവാഹച്ചടങ്ങിനിടയിലാണ് മലയാളവും തമിഴും ഒരുപോലെ കൈകാര്യം ചെയ്യുന്ന ശോഭയെ ദിനേശൻ കണ്ടുമുട്ടുന്നത്. ഒരു പാലക്കാടൻ ബ്രാഹ്മണക്കുട്ടിയാണ് ശോഭ. സ്വന്തമായി വരുമാനം കണ്ടെത്തുന്നവൾ. അഭിമാനികളായ രണ്ടുപേരും സ്വന്തം കാലിൽ നില്ക്കാൻ ശ്രമിക്കുന്നവരാണ്. ഇവരുടെ പ്രണയം നർമവും ആക്ഷനും കൂട്ടിയിണക്കിയാണ് ലൗ ആക്ഷൻ ഡ്രാമയിൽ അവതരിപ്പിക്കുന്നത്. ഫന്റാസ്റ്റിക്ക് ഫിലിംസ്, എം സ്റ്റാർ എന്റർടൈന്മെന്റ്സ് എന്നീ ബാനറുകളിൽ അജു വർഗീസും വിശാഖ് പി സുബ്രഹ്മണ്യം എന്നിവരാണ് ചിത്രത്തിന്റെ നിർമാണം. ശ്രീനിവാസൻ, മല്ലിക സുകുമാരൻ, അജു വർഗീസ്, ധന്യ ബാലകൃഷ്ണൻ, ജൂഡ് ആന്റണി എന്നിവർക്കൊപ്പം തമിഴിൽ നിന്നും കന്നടയിൽ നിന്നുമുള്ള അഭിനേതാക്കളും ചിത്രത്തിൽ അഭിനയിക്കുന്നുണ്ട്. ഷാൻ റഹ്മാനാണ് സംഗീതം. ജോമോൻ ടി ജോൺ ഛായാഗ്രഹണവും വിവേക് എഡിറ്റിംഗും നിർവഹിക്കുന്നു.
