അപ്രതീക്ഷിതമായി വന്നെത്തി ലോകത്തെ മുഴുവൻ ഭീതിയിലാഴ്ത്തിയ കൊറോണ ഇപ്പോഴും ഭീതി പടർത്തി പടർന്നു പിടിക്കുകയാണ്. എല്ലാ മേഖലകളും ഈ വൈറസിന്റെ ആക്രമണത്തിൽ നഷ്ടങ്ങളുടെ കൂമ്പാരത്തിലേക്ക് വീണിരിക്കുകയാണ്. ജോലി നഷ്ടപ്പെട്ടവരും ബിസിനസ് നഷ്ടമായവരും നിരവധിയാണ്. എല്ലാ മേഖലകളും തകർന്നപ്പോൾ ഏറ്റവുമധികം നഷ്ടം നേരിട്ടൊരു മേഖലയാണ് സിനിമ വ്യവസായം. തീയറ്ററുകൾ പൂട്ടപ്പെട്ടിട്ട് 150 ദിവസങ്ങൾ പിന്നിട്ടു. ചിത്രീകരണങ്ങൾ നിലച്ചു. പ്രത്യക്ഷമായും പരോക്ഷമായും പതിനായിരങ്ങളാണ് സിനിമ വ്യവസായത്തെ ആശ്രയിച്ച് ജീവിക്കുന്നത്.
വർഷങ്ങളായി സിനിമാരംഗത്ത് ഡ്രൈവറായി തൊഴിൽ നോക്കുന്ന വ്യക്തിയാണ് കൊല്ലം സ്വദേശിയായ സാബു ഹരിദാസൻ. ഫെഫ്‌ക കേരള സിനി ഡ്രൈവേഴ്‌സ് അസോസിയേഷനിൽ അംഗം കൂടിയായ സാബു തന്റെ തൊഴിൽ മേഖലയും പ്രതിസന്ധിയിലായതോടെ കൂലിപ്പണിയിലേക്ക് തിരിഞ്ഞിരിക്കുകയാണ്. അതിജീവനം എന്ന ക്യാപ്ഷനോടെ സാബു തന്നെയാണ് ഫോട്ടോ പങ്ക് വെച്ചിരിക്കുന്നത്. മലയാളത്തിലെ ഈ അടുത്ത കാലത്തിറങ്ങിയ ഒട്ടുമിക്ക സിനിമകൾക്കും പിന്നിൽ സാബു പ്രവർത്തിച്ചിട്ടുണ്ട്. എന്തായാലും ഈ മോശപ്പെട്ട സമയം ഏവരും അതിജീവിക്കുമെന്ന് തന്നെയാണ് എല്ലാവരും പ്രത്യാശിക്കുന്നത്.
