മാലിക്കിനെതിരെ ഉയരുന്ന വിമര്‍ശനങ്ങളോട് പ്രതികരിച്ച് ചിത്രത്തിന്റെ സംവിധായകന്‍ മഹേഷ് നാരായണന്‍. സിനിമയ്ക്ക് നേരെ ഇസ്ലാമോഫോബിയ ആരോപണങ്ങളാണ് പ്രധാനമായും ഉയര്‍ന്നത്. മാലിക് തീര്‍ത്തും ഫിക്ഷനാണെന്നും ചരിത്ര സംഭവത്തെ ആസ്പദമാക്കിയല്ല സിനിമയെന്നും മഹേഷ് നാരായാണന്‍ ആവര്‍ത്തിച്ചിരുന്നെങ്കിലും വിമര്‍ശനങ്ങള്‍ തുടര്‍ന്നു. ബീമാ പള്ളി വെടിവെപ്പിനെ അടിസ്ഥാനമാക്കിയാണ് മാലിക്കിന്റെ കഥ എന്നാണ് വിമര്‍ശനങ്ങള്‍.
ചിത്രം പുറത്തിറങ്ങിയതിന് പിന്നാലെ താന്‍ വലിയ മാനസിക പീഡനങ്ങളാണ് നേരിടുന്നതെന്നും ഒരു ഘട്ടത്തില്‍ ചിത്രം പിന്‍വലിക്കാന്‍ വരെ തോന്നിയെന്നും മാഹേഷ് നാരായണന്‍ മാധ്യമം ഓണ്‍ലൈനിന് നല്‍കിയ അഭിമുഖത്തില്‍ പ്രതികരിച്ചു. ജീവിതത്തില്‍ ഇത്രയധികം മാനസിക പീഡനങ്ങളിലൂടെ താന്‍ കടന്നു പോകുന്നത് ആദ്യമായിട്ടാണെന്നും അദ്ദേഹം അഭിമുഖത്തില്‍ പറയുന്നു. ബീമാപ്പള്ളി വെടിവെപ്പില്‍ സര്‍ക്കാരിന്റെ പങ്ക് മനപൂര്‍വ്വം ഒഴിവാക്കിയെന്നും വെളുപ്പിക്കലാണ് മാലിക്കിലൂടെ നടന്നതെന്നുമാണ് പ്രധാന ആരോപണം.
മാലിക് ബീമാപ്പള്ളി വിഷയത്തില്‍ എന്‍എസ് മാധവന്‍ അടക്കമുള്ള പ്രമുഖര്‍ വിമര്‍ശനം ഉന്നയിച്ചിരുന്നു. മാലിക് ഒരു സാങ്കല്‍പ്പിക കഥയെങ്കില്‍, ചിത്രത്തില്‍ ഒരു രാഷ്ട്രീയ പാര്‍ട്ടിയെ മാത്രമേ കാണിക്കുന്നുള്ളൂ. അതും, പച്ചക്കൊടിയുള്ളത്. എന്തുകൊണ്ട്? ലക്ഷദ്വീപിനെ കുറ്റവാളികളുടെ ഒളികേന്ദ്രമായി ചിത്രീകരിക്കുന്നത് എന്തുകൊണ്ട്? രണ്ട് വിഭാഗങ്ങള്‍ ഏറ്റുമുട്ടുമ്പോള്‍ ഒന്നിനെ മാത്രം തീവ്രവാദവുമായി ബന്ധിപ്പിക്കുന്നതെന്തുകൊണ്ട്.?തുടങ്ങിയ ആരോപണങ്ങളാണ് അദ്ദേഹം ഉയര്‍ത്തിയത്.
