സോഷ്യല്‍ മീഡിയയില്‍ എങ്ങും മമ്മൂട്ടിയുടെ ജന്‍മ ദിന ആശംസകളാണ്. ദുല്‍ഖര്‍ സല്‍മാന്‍ അടക്കം നിരവധി പേരാണ് താരത്തിന് ആശംസ അറിയിച്ച് രംഗത്ത് എത്തിയത്. നടനും സംവിധായകനും തിരക്കഥാകൃത്തുമായ ബാലചന്ദ്രമേനോന്‍ മമ്മൂട്ടിയുടെ സ്‌പെഷ്യല്‍ ഡേയില്‍ സോഷ്യല്‍മീഡിയയില്‍ കുറിച്ച വരികള്‍ ശ്രദ്ധേയമാകുന്നു. മമ്മൂട്ടിയെ അദ്ദേഹത്തിന് ആദ്യമായി പരിചയപ്പെടുത്തുന്നത് നടന്‍ സുകുമാരനാണ്.
അദ്ദേഹത്തിന്റെ വരികളില്‍ നിന്നു തന്നെ മമ്മൂട്ടിയുടെ കഴിവിനെ
ക്കുറിച്ച് മനസിലായി എന്നും ബാലചന്ദ്ര മേനോന്‍ കുറിക്കുന്നു. സിനിമയില്‍ ഒരു കാലഘട്ടത്തില്‍, മമ്മൂട്ടി പ്രത്യക്ഷമാവുമ്പോള്‍ ഒന്നടങ്കം കൂവല്‍ ഉതിര്‍ത്തിരുന്ന ഒരു കാലം ഉണ്ടായിരുന്നു . സുന്ദരനായ നിങ്ങള്‍ കൂളിംഗ് ഗ്ലാസ് കൂടി വെച്ച് മോഡി പിടിപ്പിച്ചു തീയേറ്ററിലെ പ്രേക്ഷകനെ നോക്കിയപ്പോള്‍ അവന്റെ ഉള്ളില്‍ നുരഞ്ഞു പൊന്തിയ അസൂയയുടെ ഒരു ബഹിസ്ഫുരണമായിരുന്നു അത് എന്നും ബാലചന്ദ്രമേനോന്‍ കൂട്ടിചേര്‍ത്തു.
കുറച്ചു സിനിമകളില്‍ മാത്രമേ സഹകരിച്ചുള്ളുവെങ്കിലും നമ്മള്‍ തമ്മില്‍ ആരോഗ്യകരമായ ഒരു ബന്ധം തീര്‍ത്തെടുത്തിരുന്നുവെന്നും ഓരോ വ്യക്തിയെയും അളന്നു തൂക്കി മനസ്സിലാക്കാനും അതിനനുസരിച്ചു ഇടപഴകാനും മമ്മൂട്ടിക്ക് നന്നായി അറിയാം എന്നും അദ്ദേഹം തുറന്നെഴുതി. എല്ലാവരും മേനോന്‍ എന്ന് വിളിക്കുമ്പോള്‍ മമ്മൂട്ടി എന്തുകൊണ്ടോ തുടക്കം മുതല്‍ ‘ മിസ്റ്റര്‍ മേനോന്‍’ എന്നേ വിളിക്കുകയുള്ളു . അതാണ് മമ്മൂട്ടി…. എല്ലാവരും ആശംസകള്‍ നേരുന്ന ഈ ദിനത്തില്‍ ഞാനും നിങ്ങള്‍ക്കും കുടുംബത്തിനുമായി പ്രാര്‍ത്ഥിക്കുന്നു എന്ന് ചേര്‍ത്ത് അദ്ദേഹം കുറിപ്പ് അവസാനിപ്പിച്ചു.
