പുതുവത്സര ദിനം ആഘോഷക്കാൻ ആരാധകർക്ക് സമ്മാനവുമായി പ്രിയനടൻ മമ്മൂട്ടി. മമ്മൂട്ടിയുടെ പുതിയ ചിത്രമായ ഭ്രമയുഗം സിനിമയുടെ പുതിയ പോസ്റ്റർ ആണ് അദ്ദേഹം പങ്കുവെച്ചത്. എല്ലാവർക്കും പുതുവത്സരമായ 2024ന്റെ ആശംസകൾ നേർന്നു കൊണ്ടാണ് മമ്മൂട്ടി പോസ്റ്റർ പങ്കുവെച്ചത്. രാഹുൽ സദാശിവൻ തിരക്കഥയെഴുതി സംവിധാനം ചെയ്യുന്ന ചിത്രമാണ് ഭ്രമയുഗം. മമ്മൂട്ടി പങ്കുവെച്ച പുതിയ പോസ്റ്റർ ഏറ്റെടുത്ത ആരാധകർ അദ്ദേഹത്തിന് പുതുവത്സര ആശംസകൾ നേരുകയും ചെയ്തു. ജോലിയെടുക്കാതെ ജീവിക്കേണ്ട സമയത്ത് പണി എടുത്ത് ജീവിക്കുന്ന ഒരേ ഒരു നടൻ എന്നാണ് മമ്മൂട്ടിയെ ചിലർ കമന്റ് ബോക്സിൽ വിശേഷിപ്പിക്കുന്നത്.
മമ്മൂട്ടിയുടെ എഴുപത്തിരണ്ടാം ജന്മദിനത്തിൽ ആയിരുന്നു അദ്ദേഹത്തിന്റെ ഭ്രമയുഗം സിനിമയുടെ ഫസ്റ്റ് ലുക്ക് പോസ്റ്റർ അണിയറപ്രവർത്തകർ പുറത്തു വിട്ടത്. ഫസ്റ്റ് ലുക്ക് പോസ്റ്ററിൽ ചിരിച്ചു കൊണ്ടു നിൽക്കുന്ന മമ്മൂട്ടിയായിരുന്നു ഉണ്ടായിരുന്നത്. എന്നാൽ, ആ ചിരിയും നോട്ടവും കാണുന്നവരിൽ ഭയം നിറയ്ക്കുന്നതായിരുന്നു. ഹൊറർ ചിത്രമായ ഭ്രമയുഗത്തിൽ പ്രതിനായകവേഷത്തിലാണ് മമ്മൂട്ടി എത്തുന്നതെന്നാണ് റിപ്പോർട്ടുകൾ. ഇപ്പോൾ പുറത്തിറങ്ങിയ പുതിയ പോസ്റ്ററിൽ ഒരു തെയ്യക്കോലത്തിന് സമാനമായ രീതിയിലാണ് മമ്മൂട്ടി പ്രത്യക്ഷപ്പെട്ടിരിക്കുന്നത്.
അർജുൻ അശോകനാണ് ചിത്രത്തിൽ പ്രധാനവേഷത്തിൽ എത്തുന്ന മറ്റൊരു താരം. ഭൂതകാലം എന്ന സിനിമയ്ക്ക് ശേഷം രാഹുൽ സദാശിവൻ സംവിധാനം ചെയ്യുന്ന ചിത്രമാണ് ഭ്രമയുഗം. അഞ്ച് ഭാഷകളിലായിട്ട് ആയിരിക്കും ചിത്രം റിലീസ് ചെയ്യുക. സിദ്ധാർത്ഥ് ഭരതൻ, അമൽഡ ലിസ് തുടങ്ങിയവരാണ് മറ്റ് പ്രധാനവേഷങ്ങൾ കൈകാര്യം ചെയ്യുന്നത്.