മമ്മൂട്ടി ആരാധകര് ഏറെ ആവേശത്തോടെ കാത്തിരിക്കുന്ന ചിത്രമാണ് ഭീഷ്മപര്വ്വം. ബിഗ്ബിക്ക് ശേഷം മമ്മൂട്ടിയും അമല് നീരദും ഒന്നിക്കുന്നുവെന്ന പ്രത്യേകത കൂടിയുണ്ട് ചിത്രത്തിന്. കഴിഞ്ഞ ദിവസങ്ങളില് പുറത്തിറങ്ങിയ ചിത്രത്തിന്റെ ടീസറിനും പാട്ടിനും മികച്ച പ്രതികരണമാണ് ലഭിച്ചത്. രണ്ടും യൂട്യൂബില് ട്രെന്ഡിംഗ് ലിസ്റ്റില് ഇടംപിടിച്ചിരുന്നു. ഇപ്പോഴിതാ ചിത്രത്തില് മമ്മൂട്ടി അവതരിപ്പിക്കുന്ന മൈക്കിളിന്റെ ലുക്കാണ് ട്രെന്ഡായിരിക്കുന്നത്. മഴ നനഞ്ഞ് നില്ക്കുന്ന മമ്മൂട്ടിയുടെ കിടിലന് ലുക്കാണ് അണിയറ പ്രവര്ത്തകര് പങ്കുവച്ചത്.
അമല് നീരദും ദേവദത്ത് ഷാജിയും ചേര്ന്നാണ് ഭീഷ്മപര്വ്വത്തിന്റെ തിരക്കഥ ഒരുക്കിയിരിക്കുന്നത്. റാണി പദ്മിനിയുടെ സഹരചയിതാവ് കൂടിയായ പി.ടി.രവിശങ്കറാണ് അഡീഷണല് സ്ക്രീന്പ്ലേ. മമ്മൂട്ടിക്കൊപ്പം നദിയാ മൊയ്തു, സൗബിന് ഷാഹിര്, ശ്രീനാഥ് ഭാസി, ഷൈന് ടോം ചാക്കോ, ലെന തുടങ്ങി വന് താരനിരയാണ് ചിത്രത്തിലുള്ളത്.
ആനന്ദ് സി ചന്ദ്രനാണ് അമല് നീരദ് ചിത്രത്തിനായി ക്യാമറ ചലിപ്പിക്കുന്നത്. ബിലാല് ചിത്രീകരിക്കാനിരുന്നതും ആനന്ദ് സി.ചന്ദ്രന് ആയിരുന്നു. വിവേക് ഹര്ഷന് എഡിറ്റിംഗും സുഷിന് ശ്യാം സംഗീതവും നിര്വഹിച്ചിരിക്കുന്നു. മാര്ച്ച് മൂന്നിന് ചിത്രം തീയറ്ററുകളിലെത്തും.