മികച്ച അഭിപ്രായം നേടി മുന്നേറുന്ന ചിത്രമാണ് ജുബിത് നമ്രദത്ത് സംവിധാനം നിർവഹിച്ച ആഭാസം. എന്നാൽ റിലീസുകളുടെ കുത്തൊഴുക്കിൽ പ്രദർശിപ്പിക്കാൻ തീയറ്ററുകൾ ലഭിക്കാതെ ഉഴറുകയാണ് ഈ കൊച്ചു നല്ല ചിത്രം. കമ്മട്ടിപ്പാടത്തിലൂടെ പ്രേക്ഷകരെ അത്ഭുതപ്പെടുത്തിയ മണികണ്ഠൻ ആർ ആചാരിയുടെ ഫേസ്ബുക്ക് പോസ്റ്റാണ് ഇതിനിടയിൽ ശ്രദ്ധ നേടുന്നത്. ആഭാസം കാണാൻ തീയറ്ററിൽ പോയ മണികണ്ഠന് തീയറ്ററിൽ ഷോ ഇല്ലാത്ത കാരണം ചിത്രം കാണാൻ സാധിക്കാത്ത എല്ലാ നൈരാശ്യവും വെളിപ്പെടുത്തുന്നതാണ് പോസ്റ്റ്. “പടം കാണാൻ തീയറ്ററിൽ എത്തി, പടമില്ല..! ഇതെന്തൊരാഭാസം? ” എന്നെഴുതിയ പ്ലക്കാർഡുമായാണ് മണികണ്ഠൻ നിൽക്കുന്നത്. 50ഓളം തീയറ്ററുകൾ പ്രദർശനത്തിന് അനുവദിച്ചെങ്കിലും 25 തീയറ്ററുകളിൽ മാത്രമേ പ്രദർശിപ്പിക്കുന്നുള്ളൂ. സമകാലീന സംഭവങ്ങളെ സിംബോളിക്കായിട്ട് അവതരിപ്പിച്ചിട്ടുള്ള ചിത്രത്തിൽ സുരാജ് വെഞ്ഞാറമൂട്, റിമ കല്ലിങ്കൽ, അലൻസിയർ തുടങ്ങിയവർ പ്രധാന കഥാപാത്രങ്ങളെ അവതരിപ്പിക്കുന്നു.
