മകന് പേരിട്ട കാര്യം പങ്കു വെച്ച് നടന്‍ മണികണ്ഠന്‍ ആചാരി. ഈ കഴിഞ്ഞ മാര്‍ച്ച് 19 നാണ് മണികണ്ഠനും ഭാര്യ അഞ്ജലിയ്ക്കും ഒരാണ്‍കുഞ്ഞ് പിറന്നത്. ബാലനാടാ എന്ന ക്യാപ്ഷനോടെയായിരുന്നു തനിക്ക് മകന് പിറന്ന സന്തോഷം മണികണ്ഠന്‍ സോഷ്യല്‍ മീഡിയ വഴി തന്റെ ആരാധകരെ അറിയിച്ചത്. മകന് പേരിട്ട വിവരം തന്റെ ഇന്‍സ്റ്റാഗ്രാം പോസ്റ്റിലൂടെയാണ് മണികണ്ഠന്‍ പങ്കു വെച്ചത്.
മകനും ഭാര്യക്കുമൊപ്പമുള്ള ചിത്രവും താരം പങ്കു വെച്ചിട്ടുണ്ട്. ‘ഞങ്ങളുടെ മകന് ഈ വിശാലമായ ലോകത്തിന് കൈ കൊടുത്ത് പേരു ചൊല്ലി പരിചയപ്പെടാന്‍ അവന് ഞങ്ങള്‍ ഒരു പേരിട്ടു. ചെറിയ പേരാണങ്കിലും വലിയ അര്‍ഥമുള്ള ഒരു പേര്. ഇസൈ. ഇസൈ മണികണ്ഠന്‍. തമിഴില്‍ സംഗീതം എന്നാണ് ഇസൈ എന്ന പേരിന്റെ അര്‍ത്ഥം’-എന്നാണ് കുറിപ്പ്. കഴിഞ്ഞ ലോക്ഡോണ്‍ സമയത്താണ് മണികണ്ഠന്‍ ആചാരി അഞ്ജലിയെ വിവാഹം കഴിച്ചത്. ആഘോഷങ്ങള്‍ ഒന്നുമില്ലാതെ ചടങ്ങു നടത്തിയ മണികണ്ഠന്‍, കല്യാണത്തിന് മാറ്റിവെച്ച തുക മുഖ്യമന്ത്രിയുടെ ദുരിതാശ്വാസ ഫണ്ടിലേക്ക് നല്‍കി. രജനീകാന്ത് ചിത്രം പേട്ട, വിജയ് സേതുപതി ചിത്രം മാമനിതന്‍ എന്നിവയില്‍ ശ്രദ്ധേയ വേഷങ്ങള്‍ മണികണ്ഠന്‍ ചെയ്തിരുന്നു. രാജീവ് രവിയുടെ തുറമുഖമാണ് മണികണ്ഠന്റെ ഏറ്റവും പുതിയ ചിത്രം.
