അഭിനേതാവ് നിർമ്മാതാവ് എന്നീ മേഖലകളിൽ തിളങ്ങിയിട്ടുള്ള താരമാണ് മണിയൻപിള്ള രാജു. അദ്ദേഹം നിർമ്മിച്ച സൂപ്പർ ഹിറ്റ് ചിത്രങ്ങളിൽ ഒട്ടുമിക്കതും നായകനായി എത്തിയിട്ടുള്ളത് മോഹൻലാലാണ്. ഹലോ മൈ ഡിയർ റോങ് നമ്പർ, വെള്ളാനകളുടെ നാട്, ഏയ് ഓട്ടോ തുടങ്ങി മണിയൻ പിള്ള രാജു മോഹൻലാലിനെ നായകനാക്കി നിർമ്മിച്ച സൂപ്പർ ഹിറ്റുകൾ എന്നും മലയാളിയുടെ മനസ്സിൽ തെളിഞ്ഞു നിൽക്കുന്നവയാണ്. റേഡിയോ മാംഗോയിൽ വെള്ളാനകളുടെ നാട് എന്ന ചിത്രത്തെക്കുറിച്ച് മണിയൻപിള്ള രാജു മനസ്സു തുറന്നു.
മണിയൻപിള്ള രാജുവിന്റെ വാക്കുകൾ:
മറ്റൊരു കഥയെ അടിസ്ഥാനമാക്കി ബാലൻ.കെ. നായരടക്കമുള്ള താരനിരയുമായി ഷൂട്ടിങ് തുടങ്ങാൻ നാലു ദിവസം മാത്രം ബാക്കി നിൽക്കെ മാറ്റിയെഴുതി വന്ന കഥയാണ് വെള്ളാനകളുടെ നാട്. ആർ കെ നാരായണന്റെ മാൽഗുഡി ഡേയ്സിലെ റോഡ് റോളർ രംഗത്തെ അടിസ്ഥാനപ്പെടുത്തി ഒരു കഥ എഴുതാൻ പ്രിയദർശൻ ശ്രീനിവാസനോട് പറയുകയായിരുന്നു. പൊന്മുട്ടയിടുന്ന താറാവ് എന്ന ചിത്രത്തിന്റെ ലൊക്കേഷനിൽ നിന്നു ഓരോ ദിവസവും ഷൂട്ട് ചെയ്യേണ്ട സീനുകൾ ശ്രീനിവാസൻ എഴുതി കൊടുത്തു വിടുകയായിരുന്നു അന്ന്. വെറും ഇരുപത് ദിവസം കൊണ്ടാണ് ഈ സിനിമ ഷൂട്ട് ചെയ്തത്. പ്രശസ്തമായ റോഡ് റോളർ സീൻ രണ്ടു ക്യാമറ വെച് ഒറ്റ ടേക്കിലാണ് എടുത്തത്. കോഴിക്കോട് ഈസ്റ്റ്ഹില്ലിലാണ് ആ രംഗം ഷൂട്ട് ചെയ്തത്.
