കംപ്ലീറ്റ് ആക്ടർ മോഹൻലാലിനെ നായകനാക്കി പ്രശസ്ത സംവിധായകൻ പ്രിയദർശൻ സംവിധാനം ചെയ്ത പുതിയ ചിത്രമാണ് മരക്കാർ അറബിക്കടലിന്റെ സിംഹം. മലയാളം, തമിഴ്, ഹിന്ദി, കന്നഡ, തെലുങ്കു ഭാഷകളിലായി മലയാള സിനിമയിലെ എക്കാലത്തേയും ഏറ്റവും വലിയ റിലീസായി എത്തുന്ന ഈ ചിത്രം ഡിസംബർ രണ്ടിനാണ് ലോകം മുഴുവൻ എത്തുന്നത്. മലയാള സിനിമയുടെ ചരിത്രത്തിലെ ഏറ്റവും വലിയ ചിത്രമായി ഒരുക്കിയ മരക്കാർ ആശീർവാദ് സിനിമാസ്, കോൺഫിഡന്റ് ഗ്രൂപ്, മൂൺ ഷോട്ട് എന്റർടൈൻമെന്റ് എന്നിവയുടെ ബാനറിൽ ആന്റണി പെരുമ്പാവൂർ, ഡോക്ടർ സി ജെ റോയ്, സന്തോഷ് ടി കുരുവിള എന്നിവർ ചേർന്നാണ് നിർമ്മിച്ചിരിക്കുന്നത്. ഇതിനോടകം തന്നെ ഒട്ടേറെ റെക്കോർഡുകൾ ഇട്ട മരക്കാർ പുതിയ ഒരു ചരിത്രം കൂടി ഉണ്ടാക്കിയിരിക്കുകയാണ്.
മലയാള സിനിമയുടെ ചരിത്രത്തിൽ തന്നെ ഒരു സിനിമയ്ക്കു ലഭിക്കുന്ന ഏറ്റവും വലിയ ഓവർസീസ് റിലീസ് ആണ് മരക്കാർ നേടുന്നത്. അഞ്ഞൂറിൽ അധികം ലൊക്കേഷനുകളിൽ ആണ് മരക്കാർ വിദേശത്തു റിലീസ് ചെയ്യുന്നത്. ഇന്ത്യയിൽ രണ്ടായിരത്തോളംവും വിദേശത്തും രണ്ടായിരത്തോളവും എന്ന കണക്കിൽ നാലായിരം സ്‌ക്രീനുകളിൽ ആണ് ഈ ചിത്രം പുറത്തു വരിക എന്ന് റിപ്പോർട്ടുകൾ പറയുന്നു. മലയാളത്തിലെ ഏറ്റവും വലിയ റിലീസ് എന്നതിനോടൊപ്പം, തെന്നിന്ത്യൻ സിനിമയിലെ തന്നെ ഏറ്റവും വലിയ റിലീസുകളിൽ ഒന്നാണ് മരക്കാർ നേടുന്നത്. ഗൾഫിലും,അമേരിക്കയിലും ബ്രിട്ടനിലും യൂറോപ്പിലും എല്ലാം റെക്കോർഡ് റിലീസ് ആണ് മരക്കാർ നേടുന്നത്.
കേരളത്തിൽ അഞ്ഞൂറിന് മുകളിൽ സ്‌ക്രീനുകളിൽ എത്തുന്ന മരക്കാരിനു വേണ്ടി ആഗോള തലത്തിൽ 850 ഇൽ കൂടുതൽ ഫാൻസ്‌ ഷോകൾ ആണ് ആരാധകർ ചാർട്ട് ചെയ്തിരിക്കുന്നത്. കേരളത്തിൽ മാത്രം ആദ്യ ദിനം മൂവായിരം ഷോകൾ ലക്ഷ്യമിടുന്ന ഈ ചിത്രം ആഗോള തലത്തിൽ 12000 നു മുകളിൽ ഷോകൾ ആണ് ലക്ഷ്യമിടുന്നത്. ഇന്ത്യൻ സിനിമയിലെ ഏറ്റവും മികച്ച ചിത്രത്തിനുള്ള ദേശീയ അവാർഡ് കൂടി നേടിയ ചിത്രമാണ് മരക്കാർ അറബിക്കടലിന്റെ സിംഹം.
