മരയ്ക്കാര്‍: അറബിക്കടലിന്റെ സിംഹം ഒ.ടി.ടി റിലീസിനെത്തുന്നു. ഡിസംബര്‍ 17 മുതല്‍ ഇന്ത്യയില്‍ ആമസോണ്‍ പ്രൈമില്‍ പ്രീമിയര്‍ ചെയ്യും. ഈ മാസം ആദ്യം തിയേറ്ററുകളില്‍ റിലീസ് ചെയ്ത മോഹന്‍ലാല്‍-പ്രിയദര്‍ശന്‍ കൂട്ടുകെട്ടിലിറങ്ങിയ ബിഗ് ബജറ്റ് ചിത്രം മലയാളത്തിന് പുറമെ ഹിന്ദി, തമിഴ്, തെലുങ്ക് ഭാഷകളിലും ലഭ്യമാകും.
പ്രൈം വീഡിയോയിലെ മരക്കാറിന്റെ ഡിജിറ്റല്‍ പ്രീമിയറില്‍ താന്‍ ഏറെ സന്തോഷവാനാണെന്നും ഇത് രാജ്യത്തുടനീളമുള്ള പ്രേക്ഷകര്‍ക്ക് അവരുടെ കുടുംബത്തോടൊപ്പം വീട്ടിലിരുന്ന് സിനിമ കാണാനുള്ള അവസരം നല്‍കുമെന്നും മോഹന്‍ലാല്‍ പറഞ്ഞു. ചിത്രത്തിന്റെ ഡിജിറ്റല്‍ പ്രീമിയറില്‍ പ്രൈം വീഡിയോയില്‍ പ്രദര്‍ശിപ്പിക്കുന്നതില്‍ ഞാന്‍ വളരെ ആവേശത്തിലാണെന്ന് പ്രിയദര്‍ശന്‍ പ്രതികരിച്ചു. ഈ സിനിമ എന്റെ ഹൃദയത്തോട് വളരെ അടുത്ത് നില്‍ക്കുന്നതാണ്. കഴിഞ്ഞ 20 വര്‍ഷമായി ലാലിന്റെയും എന്റെയും ഒരു കൂട്ടായ സ്വപ്നമാണിതെന്നും അദ്ദേഹം കൂട്ടിച്ചേര്‍ത്തു. ഏറെ കാത്തിരുന്ന ഈ മെഗാ എന്റര്‍ടെയ്നറുമായി ഈ വര്‍ഷം അവസാനിപ്പിക്കുന്നതില്‍ ഞങ്ങള്‍ ഏറെ സന്തോഷിക്കുന്നുവെന്ന് ആമസോണ്‍ പ്രൈം വീഡിയോ, ഇന്ത്യയുടെ കണ്ടന്റ് ലൈസന്‍സിംഗ് മേധാവി മനീഷ് മെംഗാനിയും പറഞ്ഞു.
ചരിത്രം വിശ്വസനീയമായ രീതിയില്‍ ചിത്രീകരിക്കുക എന്നതായിരുന്നു സിനിമയില്‍ നേരിട്ട പ്രധാന വെല്ലുവിളി. അറേബ്യന്‍ ചരിത്രത്തില്‍ കുഞ്ഞാലി മരക്കാര്‍ക്ക് ദൈവത്തിന്റെ സ്ഥാനമാണെന്നും പോര്‍ച്ചുഗീസ് ചരിത്രത്തില്‍ മരക്കാര്‍ വളരെ വൃത്തികെട്ടവനായ കടല്‍ക്കൊള്ളക്കാരനാണെന്നും കൂടുതല്‍ പുസ്തകങ്ങള്‍ വായിച്ചപ്പോള്‍ മനസിലായി. ‘വിജയിക്കുന്നവനാണ് ചരിത്രമെഴുതുന്നത്’ എന്നാണ് ചരിത്രത്തെക്കുറിച്ച് എപ്പോഴും പറയുന്നത്. അങ്ങനെ നോക്കുമ്പോള്‍ തന്നെ അറേബ്യന്‍ ചരിത്രമാണോ പോര്‍ച്ചുഗീസ് ചരിത്രമാണോ ശരിയായ ചരിത്രം എന്ന് അന്വേഷിച്ചു. കുറേ ചരിത്രം വായിച്ചപ്പോള്‍ കൂടുതല്‍ ആശയക്കുഴപ്പത്തിലായി. ചരിത്രത്തില്‍ മരക്കാരുടെ ജീവിതത്തിലെ ചില സൂചനകള്‍ മാത്രമാണ് അവശേഷിച്ചിട്ടുള്ളതെന്ന് മനസിലായി. എഴുതി വന്നപ്പോള്‍ 30 ശതമാനം മാത്രം ചരിത്രവും 60 ശതമാനം ഭാനവയുമായി മരക്കാര്‍ മാറുകയായിരുന്നെന്നും പ്രിയദര്‍ശന്‍ പറഞ്ഞു.
2021 ഒക്ടോബറില്‍ നടന്ന 67-മത് ദേശീയ ചലച്ചിത്ര അവാര്‍ഡുകളില്‍ മികച്ച ഫീച്ചര്‍ ഫിലിം, മികച്ച സ്പെഷ്യല്‍ ഇഫക്റ്റുകള്‍, മികച്ച വസ്ത്രാലങ്കാരം എന്നീ പുരസ്‌കാരങ്ങളും നേടിയ മലയാള സിനിമ കണ്ടതില്‍ വെച്ച് ഏറ്റവും ചെലവേറിയ ചിത്രം കൂടിയാണ് മരയ്ക്കാര്‍: അറബിക്കടലിന്റെ സിംഹം. പ്രണവ് മോഹന്‍ലാല്‍, അര്‍ജുന്‍ സര്‍ജ, പ്രഭു, സുനില്‍ ഷെട്ടി, അശോക് സെല്‍വന്‍, മുകേഷ്, നെടുമുടി വേണു, മഞ്ജു വാര്യര്‍, കീര്‍ത്തി സുരേഷ് തുടങ്ങി വന്‍താരനിരയാണ് ചിത്രത്തിനായി അണിനിരന്നത്.
