കോവിഡ് രണ്ടാം തരംഗം ആഞ്ഞടിച്ചതോടെ വീണ്ടും തകർന്നടിഞ്ഞ മലയാള സിനിമ മേഖലയെ കൈ പിടിച്ചുയർത്തുവാൻ മരക്കാർ അറബിക്കടലിന്റെ സിംഹം എത്തുന്നു. ആഗസ്റ്റ് 12ന് കേരളത്തിലെ എല്ലാ തീയറ്ററുകളിലും ചിത്രം റിലീസ് ചെയ്യും. മറ്റ് ചിത്രങ്ങൾ ആ ദിവസങ്ങളിൽ ഉണ്ടാവുകയില്ല.
മികച്ച ചിത്രത്തിനുള്ള ദേശീയ പുരസ്‌കാരം കരസ്ഥമാക്കിയ മരക്കാർ അറബിക്കടലിന്റെ സിംഹം പ്രിയദർശൻ – മോഹൻലാൽ കൂട്ടുക്കെട്ടിന്റെ ഡ്രീം പ്രോജെക്ടാണ്. 100 കോടിയോളമാണ് ബഡ്ജറ്റ്. മോഹന്‍ലാലിനൊപ്പം അര്‍ജുന്‍, സുനില്‍ ഷെട്ടി, മഞ്ജു വാര്യര്‍, കല്യാണി പ്രിയദര്‍ശന്‍, കീര്‍ത്തി സുരേഷ് എന്നിവരും മരക്കാറിലുണ്ട്. മലയാളത്തിന് പുറമെ ഹിന്ദി, തമിഴ്, തെലുങ്കു, കന്നട എന്നീ ഭാഷകളിലും പുറത്തിറങ്ങും. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍, മൂണ്‍ ഷോട്ട് എന്റര്‍ടെയിന്‍മെന്റിന്റെ ബാനറില്‍ സന്തോഷ് ടി കുരുവിള, കോണ്‍ഫിഡന്റ് ഗ്രൂപ്പിന്റെ ബാനറില്‍ റോയ് സി ജെ എന്നിവരാണ് മരക്കാര്‍ നിര്‍മ്മിച്ചിരിക്കുന്നത്. തിരുനാവുക്കരശ് ആണ് മരക്കാറിന്റെ ക്യാമറ.
