തൊണ്ണൂറുകളിലെ താരങ്ങള്‍ ഒരുമിച്ച് ചേർന്ന ഗെറ്റ് ടുഗദറില്‍ ഒരു കാലത്ത് മലയാള സിനിമയിലെ നായിക നായകന്മാരായി തിളങ്ങിനിന്ന മോഹൻലാലും മേനകയും ഡാൻസ് കളിക്കുന്ന വീഡിയോ സോഷ്യൽ മീഡിയയിൽ ഏറെ വൈറലായിരുന്നു. ഫ്ലവേഴ്സ് ടിവിയിൽ സംപ്രേഷണം ചെയ്യുന്ന ഈ പരിപാടിയുടെ പ്രമോ വീഡിയോയിൽ ഇനിയും മോഹൻലാലിന്റെ നായികയായി അഭിനയിക്കാൻ തനിക്ക് താല്പര്യം ഉണ്ട് എന്ന് വെളിപ്പെടുത്തിയിരിക്കുകയാണ് മേനക. ഇപ്പോഴും അഭിനയിക്കാൻ താല്പര്യമുണ്ടോ എന്ന മോഹൻലാലിന്റെ ചോദ്യത്തിന് സുരേഷേട്ടൻ സമ്മതിച്ചാൽ ഇനിയും മോഹൻലാലിന്റെ നായികയായി അഭിനയിക്കാൻ താൽപര്യമുണ്ട് എന്നായിരുന്നു മേനകയുടെ മറുപടി.
ഇനിയൊരു ജനറേഷനില്‍ ഇങ്ങനെയൊരു ബന്ധമുണ്ടാവുമോ എന്ന കാര്യത്തില്‍ തനിക്ക് സംശയമുണ്ടെന്ന് പരിപാടിയിൽ മണിയന്‍പിള്ള രാജു പറഞ്ഞപ്പോൾ നമ്മള്‍ ഒരുമിച്ച് കണ്ട സ്വപ്‌നം സഫലമായതിന്റെ സന്തോഷത്തിലാണ് തങ്ങളെന്ന് പ്രിയദര്‍ശന്‍ പറയുന്നു. ഒരു കാലത്ത് മലയാള സിനിമാപ്രേമികളുടെ ഏറ്റവും പ്രിയപ്പെട്ട താരജോഡികളായിരുന്നു മോഹന്‍ലാലും മേനകയും. ഇരുവരും ഒന്നിച്ച് എത്തിയ ചിത്രങ്ങളും നിരവധിയാണ്. പൂച്ചക്കൊരു മൂക്കുത്തി, ദൂരൈ ദൂരൈ ഒരു കൂടു കൂട്ടാം, എങ്ങനെ നീ മറക്കും, എന്റെ മോഹങ്ങള്‍ പൂവണിഞ്ഞു എന്നിങ്ങനെ ഒട്ടനവധി സിനിമകളില്‍ ഇരുവരും നായിക നായകന്മാരായി അഭിനയിച്ചിരുന്നു.
