സൗബിൻ ഷാഹിർ, മംമ്ത മോഹൻദാസ് എന്നിവരെ കേന്ദ്രകഥാപാത്രങ്ങളാക്കി ലാൽ ജോസ് സംവിധാനം ചെയ്ത ചിത്രമായ ‘മ്യാവു’ തിയറ്ററുകളിൽ റിലീസ് ആയി. കേരളത്തിലും ഗൾഫ് നാടുകളിലും ക്രിസ്മസ് ചിത്രമായാണ് ‘മ്യാവു’ എത്തുന്നത്. ആലുവ സ്വദേശിയായ ദസ്തകിറിന്റെയും ഭാര്യയുടെയും മൂന്നു മക്കളുടെയും കഥയാണ് ചിത്രം പറയുന്നത്.
ചിത്രത്തിന്റെ ട്രയിലറിനും ടീസറിനും വൻ സ്വീകരണമായിരുന്നു ലഭിച്ചത്. ലാൽ ജോസ് ചിത്രമാണെന്നതു കൊണ്ടു തന്നെ ഒരു ഫീൽ ഗുഡ് ചിത്രത്തിനു വേണ്ടിയാണ് പ്രേക്ഷകർ കാത്തിരിക്കുന്നത്. ട്രയിലറിലെ സൗബിന്റെ പ്രകടനത്തിന് മികച്ച അഭിപ്രായം പ്രേക്ഷകരുടെ ഭാഗത്തു നിന്ന് ഉണ്ടായിരുന്നു. അറബിക്കഥ, ഡയമണ്ട് നെക്ലേസ്, വിക്രമാദിത്യന്‍ എന്നീ സൂപ്പര്‍ഹിറ്റ് ചിത്രങ്ങള്‍ക്കു ശേഷം ലാല്‍ജോസിന് വേണ്ടി ഡോ. ഇക്ബാല്‍ കുറ്റിപ്പുറമാണ് ഈ ചിത്രത്തിൻറെ തിരക്കഥ ഒരുക്കിയത്.
സൗബിന്‍ ഷാഹിര്‍, മംമ്ത മോഹന്‍ദാസ് എന്നിവരെ കൂടാതെ മലയാളത്തിലെ പ്രമുഖ താരങ്ങളായ സലിംകുമാര്‍, ഹരിശ്രീ യൂസഫ് എന്നിവർ പ്രധാന കഥാപാത്രങ്ങളായി എത്തുന്നു. ചിത്രം പൂർണമായും ചിത്രീകരിച്ചിരിക്കുന്നത് റാസല്‍ഖൈമയിലാണ്. തോമസ് തിരുവല്ല ഫിലിംസിന്റെ ബാനറില്‍ തോമസ് തിരുവല്ലയാണ് ചിത്രം നിർമിക്കുന്നത്. ഛായാഗ്രഹണം – അജ്മല്‍ സാബു. സുഹൈല്‍ കോയയുടെ വരികള്‍ക്ക് ജസ്റ്റിന്‍ വര്‍ഗ്ഗീസാണ് സംഗീതം നൽകിയിരിക്കുന്നത്.
