വിവാഹ മോചനം തന്റെ വ്യക്തിപരമായ കാര്യമാണെന്നും ഇതുമായി ബന്ധപ്പെട്ട് പരസ്പരം കുറ്റപ്പെടുത്താനോ ചെളിവാരിയെറിയാനുമില്ലെന്ന് മേതില്‍ ദേവിക. നടനും എംഎല്‍എയുമായ മുകേഷുമായി വിവാഹ മോചനത്തിന് നോട്ടീസ് നല്‍കിയെന്നും മേതില്‍ ദേവിക മാധ്യമങ്ങളോട് പറഞ്ഞു. അതുമായി ബന്ധപ്പെട്ട പ്രശ്‌നങ്ങള്‍ പുറത്തു പറയാന്‍ താത്പര്യമില്ലെന്നും മേതില്‍ ദേവിക പറഞ്ഞു.
ഗാര്‍ഹിക പീഡന ആരോപണം താന്‍ ഉന്നയിച്ചിട്ടില്ലെന്നും സാമ്പത്തിക ലാഭത്തിനു വേണ്ടിയല്ല വിവാഹ മോചനമെന്നും അവര്‍ പറഞ്ഞു. നിയമസഭ തിരഞ്ഞെടുപ്പിനുശേഷമാണ് നിയമപരമായ നടപടികള്‍ തുടങ്ങിയതെന്നും ദേവിക മാധ്യമങ്ങളോട് വിശദീകരിച്ചു.
‘ലീഗല്‍ നോട്ടീസ് കൊടുത്തിടുത്തുണ്ട് അഭിഭാഷകന്‍ മുഖേന. ഒരാളുടെ ഫാമിലിയില്‍ കയറി എന്താണ് സംഭവിക്കുന്നതെന്ന് ആരായുന്നത് ശരിയായ രീതിയല്ല. വിവാഹ മോചനത്തിന്റെ കാരണം പുറത്ത് പറയാന്‍ ബുദ്ധിമുട്ടാണ്. എന്റെ ഭാഗത്തു നിന്നാണ് ഡിവോഴ്‌സ് ഫയല്‍ ചെയ്തത്. മുകേഷിന്റെ നിലപാട് വ്യക്തമല്ല. എന്റെ ലൈഫിലെ പ്രധാനപ്പെട്ട വ്യക്തിയാണ് അദ്ദേഹം. അദ്ദേഹത്തിന്റെ മേലെ ചെളിവാരിയിടാന്‍ താത്പര്യമില്ല. അദ്ദേഹത്തിനും അങ്ങനെ തന്നെയായിരിക്കും. വേര്‍പിരിയുക എന്നത് വേദനാജനകം തന്നെയാണ്. ആ സാഹചര്യത്തിലൂടെ കടന്നു പോകുന്ന ഞങ്ങളുടെ മാനസികാവസ്ഥ പരിഗണിക്കണം.’- ദേവിക പറഞ്ഞു.
