1990ല്‍ ടിഎസ് സുരേഷ് ബാബുവിന്റെ സംവിധാനത്തില്‍ പുറത്തിറങ്ങിയ കോട്ടയം കുഞ്ഞച്ചൻ വൻ വിജയമായിരുന്നു. ചിത്രത്തിന്റെ രണ്ടാം ഭാഗം പുറത്തിറങ്ങാത്തതിനെക്കുറിച്ച് ഇപ്പോൾ മനസ്സ് തുറക്കുകയാണ് സംവിധായകന്‍ മിഥുന്‍ മാനുവല്‍ തോമസ്‌. ചിത്രത്തിന്റെ രണ്ടാം ഭാഗം ഒരുക്കുന്നു എന്ന വാർത്ത മലയാളികൾ ഏറെ ആകാംക്ഷയോടെ ആയിരുന്നു ഏറ്റെടുത്തിരുന്നത്. ആട് 2 ന്റെ വിജയാഘോഷ വേളയിൽ വച്ചായിരുന്നു കോട്ടയം കുഞ്ഞച്ചൻ 2 ന്റെ പ്രഖ്യാപനം നടത്തിയത്. എന്നാൽ തിരക്കഥ ഇഷ്ടപ്പെടാത്തതിനെ തുടർന്നാണ് ചിത്രം വേണ്ടെന്നു വച്ചതെന്നും ഇപ്പോൾ ഓൺലൈൻ മാധ്യമത്തോട് മിഥുൻ പറയുകയാണ്.
ആട് രണ്ടിന്‌ ശേഷം ഒരുക്കേണ്ട സിനിമയായിരുന്നു കുഞ്ഞച്ചൻ എന്നും വര്‍ഷങ്ങള്‍ക്ക് മുമ്പ് അവതരിപ്പിക്കപ്പെട്ടതും പ്രേക്ഷകര്‍ ഇപ്പോഴും ഇഷ്ടത്തോടെ കാണുകയും ചെയ്യുന്ന കുഞ്ഞച്ചനെ പുനരവതരിപ്പിക്കാനാകില്ലെന്ന് വ്യക്തമായതോടെയാണ് ചിത്രം വേണ്ടെന്നുവച്ചത്‌ എന്നും അദ്ദേഹം പറയുന്നു. ഇപ്പോൾ തീയേറ്ററുകളിൽ നിറഞ്ഞോടുന്ന അഞ്ചാം പാതിരിയുടെ സംവിധായകനും മിഥുൻ ആണ്. മലയാള സിനിമയിലെ മികച്ച ത്രില്ലറുകളില്‍ ഒന്ന്‌ എന്നാണ് അഞ്ചാം പാതിരയെ പ്രേക്ഷകര്‍ വിശേഷിപ്പിക്കുന്നത്‌.
