ഷാജി പാപ്പൻ ആരാധകർക്ക് ഏറെ സന്തോഷം പകർന്ന വാർത്തയാണ് സംവിധായകൻ മിഥുൻ മാനുവൽ തോമസ് ആട് മൂന്നാം ഭാഗത്തിന്റെ പണിപ്പുരയിലാണ് എന്നത്. ആട് 3ക്ക് പറ്റിയൊരു പ്ലോട്ട് കിട്ടാത്തതിനാൽ മറ്റു പടങ്ങൾ അതിന് മുൻപ് ചെയ്യുമെന്ന് പറഞ്ഞിരുന്ന മിഥുൻ മാനുവൽ തോമസിന് ഇപ്പോൾ നല്ലൊരു പ്ലോട്ട് കിട്ടിയെന്നാണ് അറിയുവാൻ കഴിയുന്നത്.
“ഇതൊരു ബിഗ് ബജറ്റ് മൂവിയാണ്. ആദ്യ പകുതിയും ക്ലൈമാക്‌സും റെഡിയായി കഴിഞ്ഞു. ഇനി ബാക്കിയുള്ളത് എഴുതണം. അടുത്ത രണ്ടു മാസത്തിനുള്ളിൽ സ്ക്രിപ്റ്റ് മുഴുവൻ പൂർത്തിയാക്കാൻ കഴിയുമെന്നാണ് എന്റെ വിശ്വാസം.” മിഥുൻ മാനുവൽ തോമസ് പറഞ്ഞു.
ജയസൂര്യ, വിനായകൻ, ഇന്ദ്രൻസ്, ധർമ്മജൻ തുടങ്ങി ആദ്യ രണ്ടു ഭാഗത്തെ താരങ്ങളെല്ലാം തന്നെ മൂന്നാം ഭാഗത്തിൽ ഉണ്ടാകും. പക്ഷേ മൂന്നാം ഭാഗത്തിൽ പിങ്കി ഉണ്ടാകുമോ എന്ന കാര്യത്തിൽ ഉറപ്പില്ല. വില്ലന്മാരായി കൂടുതൽ കഥാപാത്രങ്ങൾ കൂടി എത്തുമെന്നാണ് അറിയുവാൻ കഴിയുന്നത്.
“ചിത്രത്തിൽ CGI ഉപയോഗിക്കുന്നത് കൊണ്ടാണ് ഇതൊരു ബിഗ് ബജറ്റ് മൂവിയാകുന്നത്. മലയാള സിനിമ ഇന്നേവരെ കണ്ടിട്ടില്ലാത്ത ഒരു ആശയവും പരീക്ഷണവുമായിരിക്കും ആട് 3യിലൂടെ പ്രേക്ഷകരിലേക്കെത്തുക.” മിഥുൻ കൂട്ടി ചേർത്തു.
