ക്രിസ്മസ് രാത്രിയിൽ ആയിരുന്നു മലയാളത്തിന്റെ സ്വന്തം സൂപ്പർ ഹീറോയുടെ കഥ പറഞ്ഞ മിന്നൽ മുരളി റിലീസ് ആയത്. ടോവിനോ തോമസിനെ നായകനാക്കി ബേസിൽ ജോസഫ് സംവിധാനം ചെയ്ത സിനിമ നെറ്റ് ഫ്ലിക്സിൽ ആയിരുന്നു റിലീസ് ചെയ്തത്. ലോകമെമ്പാടും വൻ വരവേൽപ് ആയിരുന്നു ചിത്രത്തിന് ലഭിച്ചത്. നെറ്റ്ഫ്ലിക്സിൽ ട്രെൻഡിങ്ങിൽ ടോപ് 10 ൽ ഇടം നേടിയ മിന്നൽ മുരളി ഇന്ത്യ ഉൾപ്പെടെ ചില രാജ്യങ്ങളിൽ ഒന്നാമത് എത്തുകയും ചെയ്തു.
മിന്നൽ മുരളിയെന്ന സൂപ്പർ ഹീറോയെ ഏറ്റെടുത്ത ആരാധകരുടെ മുമ്പിലേക്ക് സിനിമയിൽ മിന്നൽ മുരളിയുടെ ഡ്യൂപ്പ് ആയി എത്തിയയാളെയും അണിയറപ്രവർത്തകർ പരിചയപ്പെടുത്തിയിരുന്നു. കൂടാതെ, ഷൂട്ട് ചെയ്ത രംഗങ്ങളും പിന്നീട് അത് വി എഫ് എക്സിലൂടെ മാറ്റിയതിന്റെയും അതിന്റെ വ്യത്യസ്തതയും അണിയറപ്രവർത്തകർ പരിചയപ്പെടുത്തി.
പള്ളിക്കുന്നിലെ പുണ്യാളൻ നാടകത്തിന്റെ സമയത്ത് ഉണ്ടാകുന്ന വെടിക്കെട്ട് അപകടം, ബസിലെ യാത്രക്കാരിയായ കുഞ്ഞിനെ മിന്നൽ മുരളി രക്ഷിക്കുന്ന രംഗം, മിന്നൽ മുരളിയും ഷിബുവും റോഡിലൂടെ ഓടുന്ന രംഗം, അവസാനരംഗത്തിൽ മിന്നൽ മുരളിയും ഷിബുവും തമ്മിലുള്ള പോരാട്ടം ഈ വീഡിയോയിൽ കാണിക്കുന്നത്. ഈ രംഗങ്ങളെല്ലാം ചിത്രീകരിച്ചത് എങ്ങനെയാണെന്നും അതിനു ശേഷം വി എഫ് എക്സ് ചെയ്ത് വരുത്തിയ മാറ്റങ്ങളും വ്യക്തമാകുന്നതാണ് വീഡിയോ.
