യുഎഇ സര്‍ക്കാരിന്റെ ഗോള്‍ഡന്‍ വിസ സ്വീകരിക്കാന്‍ കഴിഞ്ഞ ദിവസമാണ് നടന്‍ മോഹന്‍ലാല്‍ ദുബായിലെത്തിയിരുന്നു. ഇപ്പോഴിതാ തന്റെ സുഹൃത്തും ബോളിവുഡ് താരവുമായ സുനില്‍ ഷെട്ടിക്കൊപ്പം നില്‍ക്കുന്ന ചിത്രങ്ങളാണ് പുറത്തു വന്നിരിക്കുന്നത്. വ്യവസായിയായ സമീര്‍ ഹംസയ്ക്കും ബോളിവുഡ് താരം സുനില്‍ ഷെട്ടിക്കുമൊപ്പമാണ് മോഹന്‍ലാല്‍.
മോഹന്‍ലാല്‍ ചിത്രങ്ങളുടെ ഷൂട്ടിങ് സെറ്റുകളില്‍ സമീറിനെ സ്ഥിരമായി കാണാറുണ്ട്. ഒപ്പം മോഹന്‍ലാലുമായി ഏറെ അടുപ്പം കാത്തുസൂക്ഷിക്കുന്ന സുഹൃത്തു കൂടിയാണ് സമീര്‍. സമീറിന്റെ കുടുബം മോഹല്‍ലാലിന്റെ വീട്ടില്‍ ഓണം ആഘോഷിക്കുന്ന ചിത്രങ്ങള്‍ നേരത്തെ സമൂഹമാധ്യമങ്ങളില്‍ ശ്രദ്ധ നേടിയിരുന്നു. യൂണിവേഴ്‌സ് വെഞ്ചേഴ്‌സ് എന്ന സ്ഥാപനത്തിന്റെ ഉടമയാണ് സമീര്‍.
ബോളിവുഡ് താരം സുനില്‍ ഷെട്ടിയും മോഹന്‍ലാലിന്റെ അടുത്ത സുഹൃത്താണ്. മോഹന്‍ലാലിനെക്കുറിച്ച് സുനില്‍ ഷെട്ടി പറഞ്ഞ വാക്കുകള്‍ നേരത്തേ വൈറലായിരുന്നു. ‘ലാല്‍ സാര്‍ ഉണ്ടെങ്കില്‍ സെറ്റില്‍ ഭയങ്കര എനര്‍ജിയാണെന്നും എപ്പോഴും തമാശ പറഞ്ഞ് സെറ്റില്‍ ഉളളവരെ ചിരിപ്പിച്ചുകൊണ്ടേയിരിക്കും. അദ്ദേഹം നല്ലൊരു പാട്ടുകാരനും കുക്കുമാണ്’, എന്നായിരുന്നു താരം പറഞ്ഞത്. മോഹന്‍ലാല്‍-പ്രിയദര്‍ശന്‍ ചിത്രം മരക്കാര്‍ അറബിക്കടലിന്റെ സിംഹത്തില്‍ സുനില്‍ ഷെട്ടി ഒരു പ്രധാന കഥാപാത്രത്തെ അവതരിപ്പിച്ചിരുന്നു. ഇതിന് മുന്‍പ് കാക്കക്കുയില്‍ എന്ന ചിത്രത്തിലും സുനില്‍ ഷെട്ടി അഭിനയിച്ചിട്ടുണ്ട്.
