ബിഗ് ബോസാകാന്‍ പോകുന്നതിന്റെ എക്‌സൈറ്റ്‌മെന്റിലാണ് താനെന്ന് മോഹന്‍ലാല്‍. ഷോയുടെ ലോഞ്ച് ചടങ്ങിലാണ് താരം മനസ്സു തുറന്നത്. ‘ 38വര്‍ഷത്തെ സിനിമാജീവിതത്തില്‍ വളരെ എക്‌സൈറ്റിംഗായുള്ള കാര്യങ്ങള്‍ ഞാന്‍ ചെയ്തിട്ടുണ്ട്. നാടകങ്ങള്‍, സ്റ്റേജ് ഷോകള്‍. എന്നാല്‍ ആദ്യമായിട്ടാണ് ഇത്തരത്തിലുള്ള ഒരു ടെലിവിഷന്‍ ഷോ അവതരിപ്പിക്കാന്‍ സാധിക്കുന്നത്. അതിനാല്‍ തന്നെ അതിന്റെ എക്‌സൈറ്റ്‌മെന്റിലാണ് ഞാന്‍. മോഹന്‍ലാല്‍ പറഞ്ഞു.
ബിഗ് ബോസ് വളരെ ബുദ്ധിപരമായ ഒരു ഷോയാണ് . അതോടൊപ്പം തന്നെ പ്രയാസകരവും വ്യത്യസ്തരായ 16 പേരെ സമന്വയിപ്പിച്ച് കൊണ്ടുപോവുക എ ന്നത് വളരെ ഉത്തരവാദിത്വം ആവശ്യമുള്ള ഒരു കാര്യമാണെന്നും അതിനായി പരിശ്രമിക്കുമെന്നും മോഹന്‍ലാല്‍ വ്യക്തമാക്കി.
നിലവില്‍ ഹിന്ദി, തെലുങ്ക് , കന്നട, തമിഴ് എന്നീ ഭാഷകളില്‍ ബിഗ് ബോസ് അവതരിപ്പിക്കുന്നുണ്ട്. യൂ എസില്‍ ഗംഭീര വിജയമായിരുന്ന ബിഗ് ബ്രദര്‍ എന്ന റിയാലിറ്റി ഷോയുടെ ഇന്ത്യന്‍ പതിപ്പാണ് ബിഗ് ബോസ്. മലയാളത്തില്‍ മിനിറ്റ് ടു വിന്‍ ഇറ്റ് പോലെയുള്ള പരിപാടികള്‍ നിര്‍മ്മിച്ച എന്റെമോള്‍ പ്രൊഡക്ഷന്‍ കമ്പനിയാണ് ബിഗ് ബോസ് മലയാളത്തിലേക്ക് എത്തിക്കുന്നത്.
പൂനെയിലെ ലോണാവാലയിലാണ് ഷൂട്ടിംഗ് സെറ്റ്. തമിഴ്, തെലുങ്ക് പതിപ്പുകളുടെ ഷൂട്ടിംഗ് സെറ്റുകള്‍ അവിടെയുണ്ട്. അത് പൊളിച്ചു മാറ്റിയിട്ടില്ല. അതേ സെറ്റില്‍ തന്നെയാണ് മലയാളം പതിപ്പും ഷൂട്ട് ചെയ്യാന്‍ തീരുമാനിച്ചിരിക്കുന്നത്. മലയാളം സിനിമയിലെ രണ്ടാം നിരക്കാരെയും ടെലിവിഷന്‍ താരങ്ങളെയും ഉള്‍പ്പെടുത്തിയായിരിക്കും ആദ്യ സീസണ്‍ ഷൂട്ടിംഗ് നടത്തുക. മത്സരാര്‍ത്ഥികളുടെ സൗകര്യാര്‍ത്ഥമായിരിക്കും ഷൂട്ടിംഗിനുള്ള ഡെയ്റ്റ് നിശ്ചയിക്കുക.
ആദ്യം ഹിന്ദിയില്‍ ആരംഭിച്ച ഈ റിയാലിറ്റി ഷോ അവസാനം അവതരിപ്പിച്ചത് സല്‍മാന്‍ ഖാന്‍ ആണ്. തെലുങ്കില്‍ ജൂനിയര്‍ എന്‍ ടി ആറും, തമിഴില്‍ കമല്‍ഹാസനും പരിപാടി അവതരിപ്പിച്ചു. പ്രശസ്തരായ പന്ത്രണ്ടോളം വ്യക്തികളെ ഒരു വീട്ടില്‍ 3 മാസത്തോളം താമസിപ്പിക്കുന്നു. ഇവിടെ എല്ലായിടത്തും ക്യാമറകള്‍ ഘടിപ്പിച്ചിട്ടുണ്ടാകും. മത്സരാര്‍ത്ഥികളുടെ ഓരോരോ ചലനങ്ങളും ഇതില്‍ പകര്‍ത്തിയതിനു ശേഷം ഇത് ടി വിയില്‍ പ്രദര്‍ശിപ്പിക്കുന്നു. മലയാളത്തില്‍ ആരൊക്കെയാണ് മത്സരാര്‍ത്ഥികളെന്നത് കാത്തിരുന്നു തന്നെ കാണേണ്ടതാണ്.
