മലയാള സിനിമയിലെ ഒട്ടുമിക്ക നടന്മാരുടെയും ഒപ്പം അച്ഛനായും അമ്മാവനായും ചേട്ടനായുമൊക്കെ അഭിനയിച്ചിട്ടുള്ള മലയാളത്തിന്റെ പ്രിയ താരമാണ് താര സംഘടനയായ അമ്മയുടെ മുൻ പ്രസിഡന്റും ഇപ്പോൾ ചാലക്കുടിയെ പ്രതിനിധീകരിക്കുന്ന പാർലമെന്റ്‌ അംഗവും കൂടിയായ ഇരിങ്ങാലക്കുടക്കാരൻ വെരി വെരി സ്പെഷ്യൽ ഇന്നസെന്റ്‌. സാക്ഷാൽ മമ്മൂട്ടിയുടെ വരെ അച്ഛനായി അഭിനയിച്ചിട്ടുള്ള ഇന്നസെന്റ്‌ ഇതുവരെയും മോഹൻലാലിന്റെ അച്ഛനായി അഭിനയിച്ചിട്ടില്ല.
ആ ആഗ്രഹം ഒരിക്കൽ ഇന്നസെന്റ്‌ മോഹൻലാലിനോട്‌ പറഞ്ഞു. ശരിയാക്കാം എന്ന് പറഞ്ഞ മോഹൻലാൽ പക്ഷെ അടുത്ത ഒരു ചിത്രത്തിൽ ചെയ്തത്‌ തികച്ചും വിപരീതമായ കാര്യം. ഇന്നസെന്റിനെ അച്ഛനാക്കുന്നതിനു പകരം മകനാക്കി. ഭദ്രൻ സംവിധാനം ചെയ്ത്‌ മോഹൻലാൽ ഇരട്ടവേഷത്തിൽ അഭിനയിച്ച ഉടയോൻ എന്ന ചിത്രത്തിൽ ശൂരനാട്‌ പാപ്പോയി എന്ന അച്ഛന്റെ രാരിച്ചൻ എന്ന മകനായി അഭിനയിച്ചത്‌ ഇന്നസെന്റ്‌ ആയിരുന്നു. അതിൽ ശൂരനാട്‌ കുഞ്ഞ്‌ എന്നൊരു മകൻ കഥാപാത്രവും മോഹൻലാൽ ചെയ്തിരുന്നു.
