സിനിമാപ്രേമികൾ വളരെ ആവേശത്തോടെ കാത്തിരിക്കുന്ന ചിത്രമാണ് എമ്പുരാൻ. മോഹൻലാലിനെ നായകനാക്കി പൃഥ്വിരാജ് സുകുമാരൻ ഒരുക്കിയ ലൂസിഫർ സിനിമയുടെ രണ്ടാം ഭാഗമാണ് എമ്പുരാൻ എന്നത് തന്നെയാണ് ചിത്രത്തിന് ഇത്രയും ഹൈപ്പ് ലഭിക്കാൻ കാരണം. കഴിഞ്ഞയിടെ മലൈക്കോട്ടൈ വാലിബൻ സിനിമയുടെ പ്രൊമോഷനിടെ സ്വന്തമായി ജെറ്റ് വിമാനവും കൊട്ടാരങ്ങളുമുള്ള ഒരു കോടീശ്വരന്റെ വേഷമാണ് ഇനി താൻ ചെയ്യാൻ പോകുന്നതെന്ന് മോഹൻലാൽ പറഞ്ഞത് ആരാധകർക്ക് ഇടയിൽ ആവേശമായിരുന്നു.
ഫാൻസ് ഗ്രൂപ്പുകളിൽ പ്രചരിക്കുന്ന വിഡിയോ ഇക്കാര്യം വ്യക്തമാക്കുകയും ചെയ്യുന്നു. എമ്പുരാൻ സിനിമയുടെ ലൊക്കേഷനിൽ നിന്നുള്ള വിഡിയോയാണ് ഇപ്പോൾ ശ്രദ്ധ നേടുന്നത്. ഹെലികോപ്റ്ററും ആഡംബര വാഹനങ്ങളും ഒക്കെയായി ഹോളിവുഡ് സിനിമയെ അനുസ്മരിപ്പിക്കുന്ന ദൃശ്യങ്ങളാണ് എമ്പുരാൻ ലൊക്കേഷൻ എന്ന പേരിൽ പ്രചരിക്കുന്ന വിഡിയോയിൽ കാണാൻ കഴിയുക. അമേരിക്കയിൽ നിന്നുള്ള ദൃശ്യങ്ങളാണിത്. സിനിമയുടെ മൂന്നാം ഷെഡ്യൂൾ ആണ് അമേരിക്കയിൽ പുരോഗമിക്കുന്നത് എന്നാണ് റിപ്പോർട്ടുകൾ.
എമ്പുരാൻ സെറ്റിൽ രണ്ടു ദിവസം മുമ്പാണ് മോഹൻലാൽ ജോയിൻ ചെയ്തത്. മലയാളത്തില്‍ ആദ്യമായി 200 കോടി ക്ലബിലെത്തിയ ചിത്രമായിരുന്നു ലൂസിഫര്‍. സിനിമയുടെ രണ്ടാം ഭാഗമായി എത്തുന്ന എമ്പുരാനായി സിനിമാ പ്രേമികള്‍ ആവേശത്തോടെ കാത്തിരിക്കുകയാണ്. പാന്‍ ഇന്ത്യന്‍ ചിത്രമായല്ല, പാന്‍ വേള്‍ഡ് ചിത്രമായാണ് എമ്പുരാന്‍ വരിക എന്നാണ് മോഹന്‍ലാല്‍ പറഞ്ഞത്. ലൂസിഫറിന് മൂന്ന് ഭാഗങ്ങള്‍ ഉണ്ടായിരിക്കുമെന്ന് പൃഥ്വിരാജ് ഒരു അഭിമുഖത്തില്‍ നേരത്തെ വ്യക്തമാക്കിയിട്ടുണ്ട്.
