മലയാളികളുടെ പ്രിയപ്പെട്ട നടൻ മോഹൻലാൽ പുതിയ വാഹനം സ്വന്തമാക്കി. തന്റെ ഗാരേജിലേക്ക് പുതുപുത്തൻ റേഞ്ച് റോവർ ആണ് താരം എത്തിച്ചിരിക്കുന്നത്. ബ്രിട്ടീഷ് ലക്ഷ്വറി വാഹന നിര്‍മ്മാതാക്കളായ ലാന്‍ഡ് റോവര്‍ നിരയിലെ പുതിയ മോഡല്‍ റേഞ്ച് റോവറാണ് മോഹൻലാൽ സ്വന്തമാക്കിയത്. കൊച്ചിയിലെ പുതിയ വസതിയില്‍ വെച്ച് ഡീലര്‍മാരിൽ നിന്ന് മോഹന്‍ലാൽ വാഹനം സ്വന്തമാക്കി.
താരം പുതിയ വാഹനത്തിന്റെ താക്കോൽ ഏറ്റു വാങ്ങുന്നതിന്റെയും തുടർന്ന് തന്റെ പുതിയ വാഹനം ഡ്രൈവ് ചെയ്യുന്നതിന്റെയും വീഡിയോ സോഷ്യല്‍ മീഡിയയില്‍ വൈറലാണ്. വീഡിയോയിൽ മോഹന്‍ലാലും പങ്കാളിയായ സുചിത്രയും ഉണ്ട്. മുതിര്‍ന്ന ഏഴ് പേർക്ക് ഒരേ സമയം സഞ്ചരിക്കാനാകുന്ന വാഹനത്തിന് 33 സെന്റി മീറ്റർ ടച്ച് സ്ക്രീന്‍ ആണ് ഉള്ളത്.
ഈ വാഹനത്തിന്റെ വിവിധ മോഡലുകൾ ഡീസലിലും പെട്രോളിലും ലഭ്യമാണ്. വിവിധ മോഡലുകളുടെ വില 2.38 കോടി മുതല്‍ 4 കോടി വരെയാണ്. ടൊയോട്ടയുടെ വെല്‍ഫയര്‍ ആയിരുന്നു 2020 ന്‍റെ തുടക്കം മുതൽ താരം സ്ഥിരം യാത്രകള്‍ക്കായി ഉപയോഗിച്ചിരുന്നത്. 1.15 കോടിയായിരുന്നു ഇതിന്റെ വില. വെൽഫയർ കൂടാതെ ലംബോർഗിനി ഉറുസ്, ടൊയോട്ട ലാൻഡ് ക്രൂയിസർ, മെഴ്‌സിഡസ് ബെൻസ് ജിഎൽഎസ് ക്ലാസ് തുടങ്ങിയ ആഡംബര കാറുകളും താരത്തിനുണ്ട്.
