ചിരിച്ചും ചിരിപ്പിച്ചും മാത്രം മലയാളിക്ക് മുന്നിലെത്തിയ താരമായിരുന്നു മോളി കണ്ണമാലി. താരത്തിന്റെ പുത്തൻ ലുക്ക് ആണ് ഇപ്പോൾ സോഷ്യൽ മീഡിയയിൽ ചർച്ചാവിഷയമാകുന്നത്. താരത്തിന്റേതായി പുറത്തിറങ്ങിയ ഫോട്ടോഷൂട്ടിന് മികച്ച സ്വീകരണമാണ് ലഭിക്കുന്നത്. ആരോഗ്യമാസികയിലെ പുതിയ ലക്കത്തിലെ കവർ ഗേളായി എത്തിയിരിക്കുകയാണ് മോളി കണ്ണമാലി. കറുപ്പിന്റെ കരുത്ത് എന്ന വിഷയത്തിൽ മാസികയിൽ താരം സംസാരിക്കുന്നുണ്ട്. സെലിബ്രിറ്റി ഫോട്ടോഗ്രാഫറായ ശ്യാം ബാബുവാണ് ചിത്രം പകർത്തിയിരിക്കുന്നത്. മോളിയെയും ഫോട്ടോഗ്രാഫറെയും പ്രശംസിച്ച് നിരവധി വ്യക്തികൾ രംഗത്തെത്തുന്നുണ്ട്. സംവിധായകനായ ഒമർ ലുലു മേക്കോവർ പൊളിച്ചല്ലോ എന്ന അടിക്കുറിപ്പോടെ ഈ ചിത്രം സോഷ്യൽ മീഡിയയിൽ പങ്കുവച്ചിരുന്നു. ഇപ്പോൾ ഫോട്ടോഷൂട്ടിനെ കുറിച്ച് തുറന്നുപറയുകയാണ് താരം.
“എറണാകുളത്ത് വച്ചായിരുന്നു ഈ ഫോട്ടോഷൂട്ട്. ആദ്യമായിട്ടാണ് ഇത്തരമൊരു വേഷം ധരിക്കുന്നത്. അവിടെ ചെന്നപ്പോഴാണ് ഇത്തരമൊരു വേഷമാണ് ധരിക്കേണ്ടതെന്ന് അറിഞ്ഞത്… അവര് തന്നെയാണ് വസ്ത്രങ്ങളെല്ലാം തന്നത്. സിനിമയിലൊക്കെ കുറച്ച് മോഡേൺ ആയിട്ടുള്ള വേഷങ്ങൾ ഇട്ടിട്ടുണ്ട്. ജീൻസും ടീഷർട്ടുമാക്കെ. പക്ഷേ ഇങ്ങനൊരു വേഷം ആദ്യമായിട്ടാണ് ഇടുന്നത്.
അവർ എനിക്ക് ആ പാൻറും ടോപ്പുമൊക്കെ തന്നപ്പോൾ ഞാൻ തന്നെ അതിശയിച്ചു. ഞാൻ അവരോട് ചോദിച്ചത് ഈ വയസ്സാം കാലത്ത് ഞാൻ ഇതൊക്കെ ഉടുക്കണോ എന്നാണ്. പക്ഷേ അതൊക്കെ ഇട്ടു കഴിഞ്ഞപ്പോൾ എനിക്ക് വലിയ സന്തോഷമായി. ഞാൻ എന്റെ ഫോണിൽ 2 ഫോട്ടോ എടുത്തോണ്ടാ പോന്നത്. വീട്ടിലെത്തി മക്കളെ കാണിച്ചപ്പോൾ അവർക്ക് അതിശയം. അവർ പറഞ്ഞു അമ്മച്ചി അടിപൊളിയായിട്ടുണ്ടല്ലോ എന്ന്. ചെറുപ്പത്തിൽ പാവാടയും ബ്ലൗസും, പിന്നെ സാരി. അതല്ലാതെ വേറെ വേഷമൊന്നും ഇട്ടിട്ടില്ല. സിനിമയിലെത്തിയ ശേഷം ഗൾഫ് രാജ്യങ്ങളിലൊക്കെ പോയപ്പോഴും സാരി തന്നെയാണ് ഉടുക്കുന്നത്.”
