മോഹൻലാൽ – പൃഥ്വിരാജ് – മുരളി ഗോപി കൂട്ടുകെട്ടിൽ ഒരുങ്ങിയ ലൂസിഫർ മലയാളത്തിലെ ഒട്ടുമിക്ക റെക്കോർഡുകളും തകർത്തിരുന്നു. വമ്പൻ താരനിര അണിനിരന്ന ചിത്രം പ്രേക്ഷകർക്കും ഒരു വിരുന്ന് തന്നെയായിരുന്നു. ചിത്രത്തിന്റെ രണ്ടാം ഭാഗമായ എമ്പുരാൻ അന്നൗൺസ് ചെയ്‌തതോട് കൂടി വൻ ആവേശത്തിലാണ് ആരാധകരും. എമ്പുരാനിൽ മമ്മൂക്കയും ഉണ്ടെന്ന രീതിയിൽ അഭ്യൂഹങ്ങൾ നേരത്തെ മുതലേ വരുന്നുണ്ട്. മമ്മൂട്ടിയുടെ പിറന്നാളിനോട് അനുബന്ധിച്ച് ആരാധകർക്ക് ഇടയിൽ ഏറെ ആവേശം കൊള്ളിക്കുന്ന ഒരു സൂചന പൃഥ്വിരാജ് പുറത്ത് വിടുകയും ചെയ്‌തിരുന്നു. തിരക്കഥാകൃത്ത് മുരളി ഗോപി മമ്മൂക്കയ്ക്ക് ആശംസകൾ അറിയിച്ച് കുറിച്ച ഇൻസ്റ്റാഗ്രാം പോസ്റ്റിന് “എന്നാൽ പിന്നെ” എന്ന ക്യാപ്‌ഷനും മൂങ്ങയുടെ സ്മൈലിയും പോസ്റ്റ് ചെയ്തിരിക്കുകയാണ് പൃഥ്വിരാജ്. ഇതോടെ എമ്പുരാനിൽ മമ്മൂട്ടി ഉണ്ടോയെന്ന അഭ്യൂഹം ശക്തമായി. എന്ന ചില ആരാധകർ ഇത് മമ്മൂട്ടിയെ വെച്ച് പൃഥ്വിരാജ് സംവിധാനം ചെയ്യാൻ പോകുന്ന ചിത്രത്തിന്റെ സൂചനയാണെന്നും പറയുന്നുണ്ട്.
ഇതിന് പിന്നാലെ ഇന്ന് മുരളി ഗോപി പോസ്റ്റ് ചെയ്തിരിക്കുന്ന പുതിയ ഫോട്ടോ അഭ്യൂഹങ്ങൾ ശക്തിപ്പെടുത്തുകയാണ്. മമ്മൂക്കയോടൊപ്പം മൂന്ന് മണിക്കൂർ ചിലവഴിച്ചെന്നും ഒപ്പം ഒരു ഫോട്ടോയെടുക്കാനും സാധിച്ചുവെന്നുമാണ് മുരളി ഗോപി കുറിച്ചിരിക്കുന്നത്. എമ്പുരാനാണോ അതോ പുതിയ ഏതെങ്കിലും സിനിമയാണോ എന്നാണ് ആരാധകരുടെ ചോദ്യം.
