പൃഥ്വിരാജും ബിജുമേനോനും പ്രധാന വേഷങ്ങളിലെത്തിയ അയ്യപ്പനും കോശിയും എന്ന ചിത്രത്തിലെ ‘കലക്കാത്ത’ എന്ന ഗാനത്തിലൂടെയാണ് നഞ്ചിയമ്മ എന്ന ഗായിക പ്രശസ്തയായത്. അയ്യപ്പനും കോശിയിലേയും അഭിനയത്തിന് 50000 രൂപയാണ് തനിക്ക് പ്രതിഫലമായി ലഭിച്ചതെന്നും ഇപ്പോള്‍ പരിപാടികള്‍ക്ക് പോകുമ്പോള്‍ ആയിരമോ രണ്ടായിരമോ കിട്ടുമെന്നും നഞ്ചിയമ്മ പറയുന്നു. സിനിമയില്‍ കണ്ടതിനു ശേഷം തന്നെ തൊഴിലുറപ്പ് പണിക്ക് വിളിക്കാതായെന്നും നഞ്ചിയമ്മ പറഞ്ഞു.
ഗൃഹലക്ഷ്മിക്ക് നല്‍കിയ അഭിമുഖത്തിലാണ് നഞ്ചിയമ്മ ഇക്കാര്യങ്ങള്‍ പറഞ്ഞത്.
‘ഇപ്പോള്‍ അഭിനയിക്കാന്‍ പോവുന്നതിന് മുമ്പ് ഇത്ര പൈസ വേണമെന്ന് പറയും. എന്റെ പണിയൊക്കെ വിട്ട് പശുവിനെയും ആടിനെയുമൊക്കെ മറന്നിട്ട് വേണ്ടേ അഭിനയിക്കാന്‍ പോവാന്‍. പരിപാടിക്ക് പോവുമ്പോള്‍ കിട്ടുന്ന തുക ചെലവിനെടുക്കും. ആ കിട്ടുന്ന പൈസക്കുളള സാധനങ്ങള്‍ വാങ്ങും. അരി ഗവണ്‍മെന്റ് തരും. എന്നാലും ബാക്കി സാധനങ്ങള്‍ വാങ്ങണ്ടേ. മുമ്പ് തൊഴിലുറപ്പ് പണിക്ക് പോകുമായിരുന്നു. സിനിമയില്‍ കണ്ടതിന് ശേഷം അവരെന്നെ ജോലിക്ക് എടുക്കാതെയായി. നീ പണിയെടുത്താല്‍ ഞങ്ങളെ പഞ്ചായത്തിലൊക്കെ ചീത്തപറയുമെന്ന് പറയും. അങ്ങനെ ആ പണിയും പോയി. പിന്നെ കണക്കു പറഞ്ഞ് പൈസ വാങ്ങിയില്ലെങ്കില്‍ എങ്ങനെ ജീവിക്കും’. നഞ്ചിയമ്മ പറയുന്നു. അട്ടപ്പാടി സ്വദേശിയാണ് നഞ്ചിയമ്മ.
