മലയാളികളുടെ പ്രിയതാരം നസ്രിയ നാസിമിന്റെ സഹോദരൻ നവീൻ നാസിം മലയാള സിനിമാ ലോകത്തേക്ക് അരങ്ങേറ്റം കുറിച്ച ചിത്രമാണ് അമ്പിളി. ജോൺപോൾ ജോർജിന്റെ സംവിധാനത്തിൽ ഒരുങ്ങിയ ചിത്രമായിരുന്നു അത്. പ്രളയകാലത്ത് റിലീസായ ചിത്രം ആ സമയത്ത് ശ്രദ്ധിക്കപ്പെട്ടില്ലെങ്കിലും പിന്നീട് മികച്ച പ്രേക്ഷക പ്രതികരണത്തോടെ തീയേറ്ററിൽ പ്രദർശനം തുടരുന്ന ഈ സാഹചര്യത്തിൽ ഓൺലൈൻ പെപ്സിന് നൽകിയ അഭിമുഖത്തിൽ നവീൻ മനസ്സുതുറന്നു. സഹോദരിയുടെ ഭർത്താവ് ഫഹദ് ഫാസിലിനെ കുറിച്ച് ചോദിച്ചപ്പോൾ അളിയൻ പാവമാണ് എന്നാണ് താരം പറഞ്ഞത്. എന്തും തുറന്നു പറയാവുന്ന ഒരാളാണെന്നും വളരെ സൗഹൃദത്തോടെ ആണ് ഞങ്ങൾ തമ്മിലുള്ള ബന്ധം മുന്നോട്ടുപോകുന്നതെന്നും താരം പറഞ്ഞു.
നസ്രിയയുടെ ജന്മദിന ആഘോഷ പരിപാടികളുടെ ഇടയിൽ എടുത്ത ഒരു വീഡിയോയിലെ നവീന്റെ നിഷ്കളങ്കമായ ചിരി കണ്ടിട്ടാണ് ജോൺ നവീനെ സിനിമയിലേക്ക് ക്ഷണിച്ചത്. അമ്പിളി എന്ന ചിത്രവും അതിലെ കഥാപാത്രവും തനിക്ക് നിരവധി പാഠങ്ങൾ പറഞ്ഞു തന്നു എന്നും ഇനി ഒരു അവസരം ലഭിച്ചാൽ ഇതെല്ലാം ഗുണകരമായിരിക്കും എന്നും താരം പറയുന്നു. തന്റെ യഥാർത്ഥ സ്വഭാവവുമായി ബോബിയ്ക്ക് സാമ്യം ഉണ്ടെന്നും ബോബിയെ പോലെ തനിക്കും യാത്രകൾ ഒരുപാട് ഇഷ്ടമാണെന്നും അദ്ദേഹം വെളിപ്പെടുത്തി.
