ഏറെ നാളത്തെ കാത്തിരിപ്പിന് ശേഷം ലേഡി സൂപ്പർസ്റ്റാർ നയൻതാരയും വിഘ്‌നേഷും വിവാഹിതരായി എന്ന വാർത്തയാണ് സോഷ്യൽ മീഡിയ ഇപ്പോൾ നിറഞ്ഞു നിൽക്കുന്നത്. തമിഴ്‌നാട്ടിലെ ഏതോ ഒരു അമ്പലത്തിൽ വെച്ച് രഹസ്യമായിട്ടാണ് ചടങ്ങ് നടന്നതെന്നാണ് വാർത്തകൾ പുറത്തു വരുന്നത്. എന്നാൽ ഔദ്യോഗികമായ സ്ഥിരീകരണമൊന്നും ഇതുവരെ ഉണ്ടായിട്ടില്ല. എന്തായാലും ഈ വാർത്ത സത്യമാകട്ടെ എന്ന പ്രാർത്ഥനയിലാണ് ആരാധകർ.
വിഘ്‌നേശ് ശിവൻ ഒരുക്കിയ നാനും റൗഡി താൻ എന്ന വിജയ് സേതുപതി ചിത്രത്തിൽ നയൻതാര ആയിരുന്നു നായികാ വേഷം ചെയ്തത്. തന്റെ ഒറ്റ പേരിൽ ചിത്രങ്ങൾ വിജയിപ്പിക്കാനുള്ള താരമൂല്യമുള്ള നയൻതാര ഇപ്പോൾ വമ്പൻ ചിത്രങ്ങളിൽ നായികാ വേഷം ചെയ്യുകയാണ്. സൂപ്പർ സ്റ്റാർ രജനികാന്തിന്റെ നായികാ വേഷം ചെയ്ത ദർബാർ ആണ് നയൻതാരയുടെ ഏറ്റവും പുതിയ റിലീസ്. മലയാളത്തിൽ നിന്നും തമിഴിൽ എത്തിയതോടെ നയൻതാരയ്ക്ക് കൈനിറയെ ചിത്രങ്ങൾ ആയി. ആദ്യം ഗ്ലാമർ വേഷങ്ങൾ ചെയ്തു ശ്രദ്ധ പിടിച്ചു പറ്റിയ നയൻതാര പതിയെ ട്രാക്ക് മാറ്റിയതിന് ശേഷമാണ് ഈ നടിയുടെ ഗംഭീര അഭിനയ പാടവം ലോകം ശ്രദ്ധിക്കുന്നത്. പിന്നീട് വമ്പൻ ചിത്രങ്ങളിലൂടെ തമിഴകത്തിന്റെ ലേഡി സൂപ്പർ സ്റ്റാർ എന്ന പട്ടം പിടിച്ചെടുക്കുകയായിരുന്നു താരം.
