കോർട്ട് റൂം ഡ്രാമയായി എത്തിയ ജീത്തു ജോസഫ് – മോഹൻലാൽ ചിത്രം ‘നേര്’ തിയറ്ററുകളിൽ പ്രദർശനം തുടരുകയാണ്. ഈ വർഷത്തെ തന്നെ ഏറ്റവും വലിയ ഹിറ്റ് ആയി മാറിയിരിക്കുകയാണ് നേര്. കഴിഞ്ഞ ദിവസം ചിത്രം അമ്പതു കോടി ക്ലബിൽ ഇടം പിടിച്ചിരുന്നു. റിലീസ് ചെയ്ത് പത്തു ദിവസം പൂർത്തിയാകുമ്പോൾ ചിത്രം ബോക്സ് ഓഫീസിൽ 60 കോടി കളക്ഷൻ നേടിയിരിക്കുന്നെന്നാണ് റിപ്പോർട്ടുകൾ. റിലീസ് ചെയ്ത് ആദ്യത്തെ പത്തു ദിവസം കൊണ്ട് കേരളത്തിലെ ബോക്സ് ഓഫീസ് കളക്ഷൻ മാത്രം 30 കോടി രൂപയാണ്.
കഴിഞ്ഞദിവസം ബുക്ക് മൈ ഷോ ആപ്പിലും നേര് റെക്കോർഡ് നേട്ടം സ്വന്തമാക്കിയിരുന്നു. റിലീസ് ചെയ്ത് ഒമ്പത് ദിവസം കഴിഞ്ഞപ്പോൾ ബുക്ക് മൈ ഷോയിൽ മാത്രം പത്തു ലക്ഷം ആളുകളാണ് നേര് കാണാൻ വേണ്ടി ബുക്ക് ചെയ്തത്. 24 മണിക്കൂറിനുള്ളിൽ മാത്രം ഒരു ലക്ഷത്തിനു മുകളിൽ ടിക്കറ്റാണ് ബുക്ക് മൈ ഷോയിൽ നേര് കാണാനായി ബുക്ക് ചെയ്തത്. ഏതായാലും ബുക്ക് മൈ ഷോയിൽ ട്രെൻഡിങ്ങ് ആയി മാറിയിരിക്കുകയാണ് നേര്. പത്തു വർഷം മുമ്പ് മോഹൻലാലിനെ നായകനാക്കി ജീത്തു ജോസഫ് ഒരുക്കിയ ദൃശ്യം വൻ വിജയമായിരുന്നു. ദൃശ്യം പിറന്ന് പത്തു വർഷത്തിന് ശേഷമാണ് ജീത്തു ജോസഫ് – മോഹൻലാൽ കൂട്ടുകെട്ടിൽ നേര് തിയറ്ററുകളിൽ വൻ വിജയമാകുന്നു എന്നതും ശ്രദ്ധേയമാണ്. ഒരു കോർട്ട് റൂം ഡ്രാമയായാണ് നേര് ഒരുക്കിയിരിക്കുന്നത്. ചിത്രത്തിൽ വിജയമോഹൻ എന്ന അഭിഭാഷക കഥാപാത്രമായാണ് മോഹൻലാൽ എത്തിയത്.
അഭിഭാഷകയും നടിയുമായ ശാന്തി മായാദേവിയും ജീത്തു ജോസഫും ചേർന്നാണ് ചിത്രത്തിന്റെ തിരക്കഥ ഒരുക്കിയത്. പതിമൂന്ന് വര്‍ഷങ്ങള്‍ക്ക് ശേഷം മോഹന്‍ലാല്‍ വക്കീല്‍ വേഷത്തില്‍ എത്തിയ ചിത്രമായിരുന്നു നേര്. സിദ്ദിഖ്, പ്രിയാമണി, ജഗദീഷ്, അനശ്വര രാജൻ, ശാന്തി മായാദേവി, ഗണേഷ് കുമാർ എന്നിവരാണ് ചിത്രത്തിൽ മറ്റ് പ്രധാനപ്പെട്ട കഥാപാത്രങ്ങളെ അവതരിപ്പിക്കുന്നത്. സതീഷ് കുറുപ്പ് ആണ് ചിത്രത്തിന്റെ ഛായാഗ്രഹണം. ‘നീതി തേടുന്നു’ എന്നാണ് ഈ മോഹന്‍ലാല്‍ ചിത്രത്തിന്റെ ടാഗ് ലൈന്‍. വിഷ്ണു ശ്യാം ആണ് ചിത്രത്തിന്റെ സംഗീതസംവിധാനം നിർവഹിച്ചത്.
