മലയാളത്തിൽ വീണ്ടും ഒരു ചലച്ചിത്ര സമുച്ചയം എത്തുകയാണ്. കേരള കഫേക്കും അഞ്ച്സുന്ദരികൾക്കും ക്രോസ് റോഡിനും പിന്നാലെ എത്തുന്ന ഇനിയും ഔദ്യോഗികമായി പ്രഖ്യാപിക്കപ്പെട്ടിട്ടില്ലാത്ത ചിത്രം സംവിധാനം ചെയ്യുന്നത് പ്രമുഖ സംവിധായകരായ രാജീവ് രവി, ആഷിക് അബു, വേണു, ജെയ് കെ എന്നിവരാണ്. ജെയ് കെ സമുച്ചയത്തിലേക്ക് ഒരുക്കുന്ന ചിത്രത്തിന്റെ ഷൂട്ടിംഗ് ഏറെക്കുറെ പൂര്‍ത്തിയായതായി റിപ്പോര്‍ട്ടുകളുണ്ട്. പൃഥ്വിരാജ് നായകനായ എസ്രയുടെ സംവിധായകനാണ് ജെയ് കെ.
എസ്രയുടെ ബോളിവുഡ് റീമേക്കിന്റെ ജോലികള്‍ ഉള്ളതിനാല്‍ ഫെബ്രുവരിയില്‍ തന്നെ അദ്ദേഹം ഈ സിനിമയുടെ ജോലികള്‍ ഏറെക്കുറെ പൂര്‍ത്തിയാക്കിയിരുന്നുവെന്ന് ടൈംസ് ഓഫ് ഇന്ത്യ ആണ് റിപ്പോര്‍ട്ട് ചെയ്തത്. അദ്ദേഹത്തിന്റെ ചിത്രം ലിംഗരാഷ്ട്രീയം പരാമര്‍ശിക്കുന്ന, അറുപതുകള്‍ പശ്ചാത്തലമാക്കുന്ന ഒരു ചിത്രമാണ് ഒരുക്കുന്നതെന്നും അറിയുന്നു. മറ്റു മൂന്ന് സംവിധായകരും അവരുടെ ചിത്രത്തിന്റെ ചില ഷോട്ടുകൾ മാത്രമാണ് ചിത്രീകരിച്ചിട്ടുള്ളത്. നാലു ചെറു സിനിമകളിലും ആയി മലയാളത്തിലെ നിരവധി താരങ്ങൾ അണിനിരക്കും എന്ന റിപ്പോർട്ടുകളും ലഭിച്ചിട്ടുണ്ട്. ഏറെ വൈകാതെ ചിത്രത്തിന്റെ ഒഫീഷ്യൽ അനൗൺസ്മെന്റ് ഉണ്ടാകും.
