മലയാള സിനിമയില്‍ ചെറുതും വലുതുമായ ഒരു പിടി നല്ല കഥാപാത്രങ്ങള്‍ ചെയ്ത് പ്രേക്ഷക ശ്രദ്ധ നേടിയ താരമാണ് നിരഞ്ജന അനൂപ്. കേരളകൗമുദി ഓണ്‍ലൈനില്‍ താരം നല്‍കിയ അഭിമുഖത്തിലെ ഒരു സുപ്രധാന വെളിപ്പെടുത്തലാണ് ഇപ്പോള്‍ വാര്‍ത്തകളില്‍ ഇടം നേടുന്നത്. മലയാള സിനിമയിലെ എക്കാലത്തെയും സൂപ്പര്‍ ഹിറ്റ് ചിത്രങ്ങളിലൊന്നായ ദേവാസുരവും നിരഞ്ജനയുടെ ജീവിതവുമായി തമ്മില്‍ ഒരു ബന്ധമുണ്ട് എന്നാണ് താരം വെളിപ്പെടുത്തുന്നത്.
രഞ്ജിത്തിന്റെ തിരക്കഥയില്‍ പിറന്ന ദേവാസുരം എന്ന ചിത്രത്തിലെ കേന്ദ്രകഥാപാത്രമായ മംഗലശ്ശേരി നീലകണ്ഠനും ഭാനുമതിയും തന്റെ മുത്തച്ഛനും മുത്തശ്ശിയുടേയും യഥാര്‍ത്ഥ ജീവിതകഥയാണ് എന്നാണ് താരം അഭിമുഖത്തില്‍ പറയുന്നത്. ദേവാസുരം എന്ന ചിത്രം റിലീസ് ചെയ്ത ആറു വര്‍ഷങ്ങള്‍ക്ക് ശേഷമാണ് താന്‍ ജനിച്ചതെന്നും ആറാം വയസ്സിലാണ് ചിത്രം കാണുന്നതെന്നും നിരഞ്ജന അഭിമുഖത്തില്‍ പറയുന്നു.
കുടുംബകഥയാണെന്നു താന്‍ അറിഞ്ഞിരുന്നില്ലെന്നും പിന്നീട് ആണ് മംഗലശ്ശേരി നീലകണ്ഡനും ഭാനുമതി യും തങ്ങളുടെ ആളുകളാണെന്ന് അറിയുന്നതെന്നും താരം വെളിപ്പെടുത്തി. സിനിമ കാണാന്‍ കഴിഞ്ഞതില്‍ തനിക്ക് അതിയായ സന്തോഷമുണ്ടെന്നും കാരണം ജീവിതത്തില്‍ നേരിട്ട് മുത്തശ്ശനേയും മുത്തശ്ശിയേയും നേരിട്ട് കണ്ടിട്ടില്ലെന്നും നിരഞ്ജന പറഞ്ഞുവയ്ക്കുന്നു. മാത്രമല്ല മംഗലശ്ശേരി തറവാട്ടിലെ ഇളയതലമുറക്കാരി കൂടിയാണ് നിരഞ്ജന അനൂപ്.
